Chanson. — L’Amour qui loge en ma poitrine

L’Amour qui loge en ma poitrine, Qui mes sens divise et mutine Et les fait bander contre moy, Le traistre est de l’intelligence De ceux qui revoltent la France, Ennemis de leur jeune roy. Comme eux il est grand en cautelle, Travaillant de guerre immortelle Mon cœur qui l’a si bien reçeu ; Et d’une modeste feintise Ses cruels projets il deguise. C’est ainsi comme il m’a deçeu. Il m’a fait changer de pensée, J’ay ma foy premiere laissée, Et la loy des bons peres vieux ; Or’ pour toute deïté sainte, J’adore en honneur et en crainte La belle clairté de vos yeux. Les mutins surprennent les villes, Et par leurs discordes civilles Comblent tout de sang et de feu ; Et luy, me prenant à l’emblée, De maux a mon ame comblée, Et me fait mourir peu à peu. L’un d’eux des honneurs se propose, L’un des biens, l’autre plus grand’chose, L’autre un paradis bien-heureux ; Les biens, les honneurs et l’empire, Et le paradis où j’aspire, C’est d’estre tousjours amoureux.