Complainte. — Depuis l’aube du jour, je n’ay point eu de cesse

Depuis l’aube du jour, je n’ay point eu de cesse De pleurer, de crier et de me tourmenter. Maudissant l’inhumain qui jamais ne me laisse, Et semble que mon mal serve à le contenter. Helas ! je n’en sens point mon ame estre allegée ; Les pleurs ne rendent point mon cœur plus dechargé ; Ma fureur, par despit, s’en fait plus enragée, Et plus cruel l’amour dans mon sang hebergé. Le jour s’est retiré, voicy la nuict veneuë, Qui soulage les cœurs des hommes travaillez ; Mais, plus fiere tousjours, ma douleur continuë, Et, vainqueurs du sommeil, mes maux sont éveillez ; Si j’ay souffert le jour quelque angoisse pressante, Quelque jaloux penser en fureur converty, La nuict, propre aux soucis, fait que mieux je les sante, N’estant plus mon esprit des objets diverty. Le jour ne m’est pas jour, puis que je ne voy chose Qui me donne liesse et me face esperer ; La nuict ne m’est pas nuict, puis que je ne repose Et que je sens la nuict ma douleur s’empirer. Ah ! Dieu ! que de pensers tournent dedans ma teste ! Que j’en voy sans repos voller devant mes yeux ! Que je suis agité d’orage et de tempeste ! Et si je ne voy rien qui me promette mieux. J’avois eu d’autres fois la poitrine allumée Des bluëttes qu’Amour lance au commencement ; Mais, helas ! ce n’estoit qu’une simple fumée Aupres du feu couvert qui me va consommant ; Car ce faux enchanteur, pour nous donner courage Et nous rendre des siens, se monstre gracieux ; Puis, si tost qu’il nous tient, il change de visage, Et, s’il faisoit le doux, il fait l’audacieux. Comme le simple oiseau, qui ne se peut defendre De la douceur du chant dont il est abusé, Et comme le poisson trop goulu se va prendre, Voulant prendre l’appast du pescheur plus rusé, Ainsi je me suis pris dans l’embusche traîtresse Qu’Amour avoit tenduë afin de m’attraper, L’amorçant des regards, d’une belle deesse, Dont le plus grand des Dieux n’eust sceu libre échaper ; Si tost que je la vey, mon ame en fut émeuë, Et ma foible raison soudain m’abandonna ; Mille petits esprits qui sortoient de sa veuë, Passerent par mes yeux, dont mon cœur s’estonna ; Et vey tant de beautés, que, sans faire defance, Vaincu, je me rendy, ne pouvant mesurer Comme je me perdois, et que, pour ma souffrance, Je ne trouveroy rien qui me fist esperer. Las ! que depuis ce tans j’ay supporté de peines ! Que j’ay perdu de jours, que j’ay veillé de nuicts, Poursuivy sans cesser d’une rage inhumaine, Qui de la fin d’un mal fait naistre mille ennuis ! Sa rigueur, toutesfois, me seroit agreable Si j’avois quelque espoir d’alleger ma douleur ; « Mais c’est un trop grand mal de languir miserable, Et n’esperer ny paix ny trêve à son malheur. » Si la fleche d’amour dont mon ame est blessée, Ne m’eust touché qu’un bras, je l’eusse separé ; J’eusse coupé d’un coup la partie offensée Pour finir le tourment trop long-tans enduré. Mais, las ! cette poison, tout partout espanduë, M’envenime le sang, l’ame et l’entendement ; Mon cœur en est saisi. C’est donc peine perduë D’esperer que le tans m’y trouve allegement. Ce qui plus me tourmente et qui croist mon malaise, C’est qu’encor en souffrant tant d’aspres passions (O cruauté du ciel !), il faut que je me taise, Et feigne une liesse en mes afflictions. Car, durant mes travaux, je prendroy patience, Voire et m’honorerois de beaucoup endurer, Si celle que je sers en avoit connoissance, Et si je luy pouvoy librement declarer. Ma Diane, mon cœur, ma lumiere et mon ame, Clef de tous mes pensers, source de mon soucy, Helas ! sentez-vous point que ma cuisante flame S’allume de vos yeux et s’en nourrist aussy ? Ils font que mon ardeur tousjours vive demeure ; Ils font que mes desirs ne sont jamais lassez, Et feront que bien-tost il faudra que je meure, Bien heureux toutesfois si vous le cognoissez.