Complainte. — Je veux maudire Amour, dieu de sang et de flame

Je veux maudire Amour, dieu de sang et de flame, Et du ciel contre luy la justice esmouvoir, Outré des passions qui traversent mon ame, Depuis qu’elle est reduite aux fers de son pouvoir. Son pouvoir ! qu’ay-je dit ? Helas ! j’ay fait offence, C’est le vostre, Diane, auquel je suis soumis, Et ne reconnoy plus Amour ny sa puissance, Puis que je vois qu’Amour est de vos ennemis. Vostre œil seul me commande, et mon cœur tributaire Ne connoist autre amour, autre empire, autre loy ; Je supporte ce joug comme un mal necessaire, Et plus j’en suis contraint, plus s’augmente ma foy ; Pour tant d’assauts divers, dont mon ame opressée S’est veuë en vous servant sans pitié recharger, Jamais je ne changeay ceste ferme pensée : La mort mesme et le tans ne la pourroient changer. Je ne déguise point, mon cœur n’est point volage ; Vous sçavez la grandeur de ma fidelité, Car les rays de vostre œil lisent dans mon courage ; Puis on ne peut tromper une divinité. Si donc vous le sçavez, et qu’ayez connaissance Que je n’espere rien pour ma ferme amitié, Au moins faites semblant, pour toute recompanse, Que vous plaignez ma peine et qu’en avez pitié. Las ! je sçays que le mal, dont mon ame est saisie, Vient de m’estre à vos yeux follement hazardé ; J’en ai perdu la veuë ainsi que Tirésie ; Le decret de Saturne est pour moy trop gardé. Toutesfois je ne puis ny ne veux me distraire De ces flambeaux divins, mon aimable tourment, Et me plais de languir en si belle misere, Puizant du malheur mesme un vray contentement. Vous pouvez bien juger mon amour estre extresme. Puis que le desespoir ne la peut offencer, Et que pour vous aimer je fay guerre à moy-mesme, Secondé seulement de mon triste penser. Celuy qui bien aimant d’espoir se reconforte, Ne se peut dire aimer s’il m’est accomparé, Veu que sans reconfort ma douleur je supporte, Et que je suis constant estant desesperé. Les herbes que l’on voit au printans desirable Ont leurs effets divers et leur proprieté, Et de tant d’animaux l’un est doux et traitable, L’autre se bagne au sang et à la cruauté. Or la proprieté que le ciel m’a donnée, C’est d’adorer vos yeux, leur faveur poursuivant ; Et la vostre au contraire est de m’estre obstinée Et croistre en cruautez mieux j’iray vous servant. De vous donc je ne puis justement me complaindre, Mais du ciel inhumain et du mal’heureux sort, Qui jusqu’à un tel point m’ont bien voulu contraindre, Qu’aimant vos yeux divins je dois aimer ma mort. Vrayment je l’aime aussi ; car pront et volontaire, Voire avecque plaisir, je volle à mon trespas ; Et, lorsque la Raison me remonstre au contraire Et m’en veut retirer, je ne l’escoute pas. Si croy-je aucunesfois qu’il est bon que j’evite, Pour adoucir mon mal, le feu de vos beaux yeux, Je le fay, mais en vain ; car rien ne me profite, Et pour vous esloigner je ne m’en trouve mieux. Le cerf qui sent d’un trait sa poitrine entamée, Esloignant le chasseur, n’amoindrit sa douleur ; Aussi pour vous füir, l’ardeur trop allumée, Qui fait boüillir mon sang, n’a pas moins de chaleur. Si donc je ne voy rien qui me soit secourable, Que ne fay-je dessein de mourir malheureux, Sans espoir que le ciel, quelque jour favorable, Change en benin aspect mon astre rigoureux ? Voila tout le loyer où il faut que j’aspire, Pour avoir si longtans servi fidellement ; Toutesfois c’est loyer, quoy que l’on vueille dire, Car il meurt bien-heureux qui meurt en bien-aimant.