Dialogue. — Amour, ame des cœurs, esprit des beaux espris

Amour, ame des cœurs, esprit des beaux espris, Je te conjure, enfant, par ta mère Cypris, Par ton arc, par tes traits, par ta plus chere flame, Par ces yeux où, si fier, tu siez en majesté, Par les cris et les pleurs, fruits de ma loyauté, De dire à ce depart un adieu à ma dame. Que veux-tu que je die ? Hé ! te vaut-il pas mieux, Toy-mesme, en distilant ta douleur par tes yeux, La baiser doucement, et prendre congé d’elle ? Tes pleurs, ta contenance, et la triste langueur Qui se lit sur ton front, contraindront sa rigueur, Si son cœur n’est cruel autant comme elle est belle. Las ! Amour, je ne puis. Le coup que je reçoy, M’éloignant de ses yeux, me met si hors de moy, Que ma langue ne peut former une parole. Je ne fay que crier, gemir et soupirer. Les petites douleurs se peuvent declarer, Mais non le desespoir qui rend mon ame folle. Bien donc, puisqu’il te plaist, je m’en vay la trouver, Mais je me veux armer, afin de n’esprouver Ses yeux, qui, tant de fois, m’ont jà pensé contraindre. Tes tourmens me font peur d’essayer leur effort. Conte moy cependant quel est ton déconfort, Et de quelles rigueurs pour toy je me dois plaindre. Amour, roy des esprits, à ton gré flechissans, Qui luy peut mieux conter les douleurs que je sans Que toy, qui les fais naistre en mon ame captive ? Qui luy peut mieux monstrer ma constance et ma foy Que sa rigueur extresme ? et qui peut mieux que toy Amollir ceste dame, ains ceste roche vive ? Dy-luy le desespoir où je me voy reduit, Or’ qu’un depart forcé loing d’elle me conduit Et qu’une mort prochaine est ma seule esperance. Apres conjure-la, par ma ferme amitié Et par ses doux regars qui promettent pitié, Qu’elle ait aucunesfois de mon dueil souvenance. Comme aussi de ma part je ne veux rien penser, Entreprendre, inventer, parfaire ou commencer, Exilé de ses yeux, qu’en sa seule memoire ; N’ecrivant un seul vers qui n’ait pour argument Mes desirs sans espoir, ma constance au tourment, Sa vertu, ses beautez, son mérite et sa gloire. Amour, tu luy diras, pour mes maux enchanter, Qu’elle a mille moyens de se representer Quelle sera ma vie en tenebres laissée : Soit en voyant le ciel, l’air, la terre ou les eaux, Soit oyant dans un bois le doux chant des oiseaux, L’image de ma peine en tous lieux est tracée. Est-elle en un taillis à l’écart quelquefois ? Qu’elle pense me voir, au plus secret d’un bois, Découvrant mes ennuis aux buissons et aux arbres. Voit-elle un haut rocher ou un vieux bastiment ? Qu’elle pense me voir, par mon dueil vehement, Attendrir de pitié les rochers et les marbres. S’il pleut aucunesfois, pense aux eaux de mes pleurs ; Et, quand l’esté boüillant nous cuira de chaleurs, Pense au feu plus ardant qui me brûle et saccage ; Si le ciel de tonnerre ou d’orage est noircy, Pense que mon cœur trouble est esmeu tout ainsy D’ennuy, de desespoir, de tempeste et d’orage. Bref, que ses yeux si clairs ne puissent plus rien voir Qu’aussi-tost ma douleur ne la vienne esmouvoir Et n’arrache un soupir de son ame cruelle. Car si, par son depart, je doy tant endurer, Quel bien, pour mon salut, puis-je, helas ! desirer, Fors qu’elle ait sentiment du mal que j’ay pour elle ?