Dialogue. — Qui vous rend, ô mes yeux ! vostre joye premiere

Qui vous rend, ô mes yeux ! vostre joye premiere, Vu que vous n’estiez plus qu’aux pleurs accoustumez ? — L’esperance de voir nostre aimable lumiere, Et d’adorer bien-tost ses rayons tant aimez. D’où vient que mon oreille est si pronte et soudaine, Et qu’elle est attentive à tout bruit qui se fait ? — Il lui semble d’ouyr cette voix plus qu’humaine Qui peut rendre mon cœur contant et satisfait. Est-ce Amour, ô mes pieds ! qui vous preste ses ailes, Vu que les jours passez vous ne pouviez marcher ? — C’est que nous courons voir des beautez immortelles, Dont l’effort suffiroit pour mouvoir un rocher. Pourquoy donc, ô mon cœur ! quand cet heur nous arrive, Languis-tu de foiblesse et te vas effroyant ? — C’est l’extrême desir qui de force me prive, Puis je crain de mourir de joye en la voyant.