Discours. — Si l’Amour est un dieu, c’est un dieu d’injustice

Si l’Amour est un dieu, c’est un dieu d’injustice, Reconnaissant le moins ceux qui luy font service ; Un aveugle en nos maux, un enfant inconstant, Au jouët du hazard ses faveurs departant, Qui s’abreuve de sang et de larmes brûlantes, Et qui perçe les cœurs de flèches differantes, Afin que nos esprits, errans diversement, Sans jamais reposer soient tousjours en tourment. Vous qui de ses rigueurs n’avez la connoissance, Ne vous esclavez point, faites luy resistance ; Les plus loyaux amans sont moins recompensez. Mon mal peint en ces vers le fait connoistre assez. Cet enfant invaincu, Dieu de sang et de flame, Un jour, pour mon malheur, me fist voir une dame Qui de ses chauds regards tout le ciel allumoit, Et les petits amours comme roses semoit. Si tost que je la vey, mon ame en fut esmuë, Et l’Amour aussitost flamboyant en sa veuë, Comme un esclair subtil par un verre élancé, Passa dedans mon cœur, qu’il n’a jamais laissé. Je l’adoray depuis comme chose divine, Et rien qu’un feu si beau n’eschauffoit ma poitrine ; En ses yeux seulement tout mon heur s’assembloit, Et tout autre plaisir ennuyeux me sembloit. Mais pour premier malheur de ma triste avanture, Un mary deffiant, de jalouse nature, Comme un dragon veillant de la voir m’empeschoit, Et son riche thresor avarement cachoit. Tout ce qu’on dit d’Argus de luy se peut bien dire : Jamais le doux sommeil, quand Phebus se retire, Ne luy ferme les yeux ; il veille incessammant, Ou, s’il dort, il l’entend et la voit en dormant ; Et, quand un papillon volle autour de la belle, Il crie et veut sçavoir s’il est malle ou femelle. De ce maudit jaloux mon mal est procedé ; Car depuis, la trouvant, cent fois j’ay retardé (Trop discret pour mon bien) de luy faire ma plainte, Et tandis mon desir croissoit par la contrainte, Ainsi que le brazier sous la cendre caché, Ou comme un grand ruisseau quand il est empesché. Mais, plus que mon malheur, je plaignoy le servage De la jeune beauté, roine de mon courage, Qui sous un joug si dur faiblement languissoit, Et sans aucun plaisir sa jeunesse passoit. Souvent de ce regret ayant l’ame blessée, A part contre le ciel j’ay ma plainte dressée, De ce qu’il assembloit, sans ordre et sans raison, Avec un froid hyver cette belle saison ; Et bien souvent aussi, plein d’amoureuse rage, Comme s’il fut present, j’usoy de ce langage : O mary trop cruel pour si douce beauté, Que penses-tu gaigner gesnant sa liberté ? Ton extrême rigueur son vouloir ne retarde, Si tu gardes le corps l’ame est hors de ta garde, Tu rens par tant de soin l’amant plus enflammé : Un plaisir trop permis n’est jamais bien aimé. Le malade aime l’eau qui luy est deffenduë, Et l’amour par contrainte est plus chaude renduë. Argus avoit cent yeux, Amour les enchanta, Et le palais d’airain Jupiter n’arresta. Celle peche le moins qui a plus de licence, Et ce qui desplaisoit est cher par la deffense. Mais, si ton cœur felon ne peut estre adoucy, Au moins de la garder laisse moy le soucy. Ne te travaille point ; je veux que l’estincelle Qui luit en mon esprit tous les autres decelle ; Je liray dans leurs cœurs, quand plus ils se feindront, Et te descouvriray ce qu’ils entreprendront. De mille autres propos j’accusoy sa rudesse, M’efforçant quelquefois de luy faire caresse. Et pour mieux deguiser le mal qui me tenoit, Je destournoy les yeux quand sa femme venoit ; Et, de peur seulement de la voir maltraitée, Ma chaleur d’un soupir n’osoit estre esventée. Sage discretion, tu m’as bien cher cousté ! Sans tant de vains respects j’eusse plus profité. Ainsi durant long-tans je languis miserable, Esperant que l’Amour, quelque jour favorable, S’ennuyant de mes maux, prendroit de moy pitié, Et qu’il falloit sans plus couvrir mon amitié. Las ! qu’un nuage espais couvre l’esprit de l’homme ! Durant qu’en ces desseins mon cerveau je consomme, Et que je pers le tans, cet archer rigoureux, Voulut qu’un jeune prince en devint amoureux, Qui sans tant de respects descouvrit sa pensée, Rendant de sa beauté ma maistresse blessée : Seul il estoit son bien, sa lumiere et son cœur, Et ce nouveau soucy, de sa crainte vainqueur, Qui d’un aveugle feu sans pitié la devore, Luy fait mespriser tout sinon l’œil qu’elle adore. Elle qui par avant n’osoit lever les yeux, Se mocque maintenaint du soin trop curieux De son mary jaloux : elle est toute de flame Et rien plus que l’Amour ne commande en son ame. Ah ! prince bien-heureux, roy de sa volonté, Que je porte d’envie à ta felicité ! Non pour estre sorty d’un si fameux lignage, Non pour tant de beaux traits qu’on voit sur ton visage, Non pour estre en cent lieux justement renommé, Non pour tant de lauriers dont ton front est semé, Non pour mille vertus honorans ta jeunesse, Mais pour estre adoré de ma seule deesse ; Voilà ton plus grand heur, dont je suis envieux ; Tu as jouy d’un bien qui n’appartient qu’aux dieux. Or durant cette flame à mon bien si contraire, Oncques de mes liens je ne me peu desfaire ; A l’envy du malheur ma constance augmenta, Et jamais le despit si fort ne m’irrita Que je peusse blasmer l’ardante amour de celle Qui, si douce à autruy, m’estoit tousjours cruelle. De son nouveau desir mon malheur j’accusai, Et tousjours sans flechir, constant, je m’opposai, Resolu d’endurer ; mesme, s’il se peut dire, Pensant à son plaisir j’allegeoy mon martire ; Et, l’œil devers le ciel, je prioy bassement Qu’un couple si parfait s’entr’aimast longuement, Hayant plus que la mort ceux qui, brûlez d’envie, Troubloient l’heureux repos d’une si douce vie. Ainsi ferme tousjours, j’aimoy sans estre aimé, Et comme si mon cœur au sien fut transformé, J’avoy part à son bien, sa liesse estoit mienne, Oubliant ma douleur pour soupirer la sienne, Lorsque quelque envieux d’un langage cuisant, Alloit de ses amours franchement devisant : Bref, en ferme amitié n’ayant point de semblable, J’aidois à mon malheur pour luy estre agreable. Qui diroit le regret que mon cœur supporta, Quand ce prince à la fin de ses yeux s’absenta, Emportant quand et soy son ame et sa puissance, Et ne luy laissant rien que l’ennuy d’une absance ? Il falloit que son cœur fust en roc endurcy, De pouvoir, trop cruel, l’abandonner ainsi, Voir pleurer ses beaux yeux pour forcer sa demeure ; De moy sans la laisser je fusse mort à l’heure. Helas ! combien depuis ce rigoureux depart, Desdaignant tous plaisirs, l’ay-je veuë à l’escart Soupirer tendrement, pensive et solitaire, Monstrant que sans le voir rien ne luy pouvoit plaire ? Comme un que le soleil dans un bois a laissé, Ne peut plus remarquer l’endroit qu’il a passé ; Une effroyable horreur couvre l’herbe fleurie, Et ce qui luy plaisoit luy donne fascherie. Ainsi, se voyant loin du soleil de ses yeux, La cour ne luy est plus qu’un desert ennuyeux ; Tout objet luy desplaist, sa parole forcée Monstre à qui l’entretient qu’ailleurs est sa pensée. O cœur remply d’amour, de constance et de foy, Tu meritois trouver un amant tel que toy ! Que de vraye amitié ton amour eust acquise, Si en autre qu’un grand ta fortune l’eust mise ! Mais durant qu’en regrets tu te vas consumant, Maudissant la rigueur d’un triste éloignemant, Celuy qui tient la clef de ton ame enchaisnée, Ne songe plus en toy, t’ayant abandonnée ; Une autre affection regne en sa volonté, Foible jouët à vent, deçà delà porté. Et puis aimez les grands, croyez en leur langage ! La bise en arrivant n’abat tant de fueïllage, Et n’esmeut sur la mer tant de flots escumans, Comme ils font et refont de divers changemans : Leur flamme aussi soudain est partout espanduë, Et pensent que l’amour de chacun leur est deuë. De ce dernier malheur à ma dame advenu, Je suis plus que jamais angoisseux devenu ; Car, outre le tourment coustumier que j’endure, Je pleure maintenant sa piteuse advanture, Et vay blasmant le ciel d’un esprit despité De ce qu’il ne punist tant de legereté. Louë Amour qui voudra, c’est une frenaisie, Que les fols ont fait dieu selon leur fantaisie, Un mal, une fureur, un fort enchantement, Par ses charmes cruels troublant l’entendement. Las ! si mon foible esprit n’estoit troublé de rage, Je me retireroy connaissant mon dommage, Ou, d’un autre desir plus doucement espoint, Je cesseroy d’aimer ce qui ne m’aime point. Mais d’un si puissant trait ma raison est forcée, Que je suy malgré moy la trace commencée, Et sers sans profiter une ingrate beauté, Qui pour aimer autruy n’a plus de liberté. Or ce dernier confort pour remede j’embrasse, Que si dans son esprit la raison trouve place, Et qu’un jour le despit justement allumé Fasse mourir l’amour d’un qu’elle a trop aimé, Qu’alors de mes douleurs elle aura connoissance. Payant tant d’amitié de quelque recompanse. Et verra quelle erreur follement l’abusoit, Quand un prince inconstant ses desirs maistrisoit. L’amour des grands seigneurs est tousjours dommageable Et sert le plus souvent au vulgaire de fable ; Nulle discrétion leur fureur ne reçoit, Et dès qu’ils sont espris chacun s’en apperçoit, Car cent mille espions veillent sur leurs affaires. La grandeur et l’amour sont deux choses contraires.