Élégie II. — Rompons tous les presens d’une ame si traistresse

Rompons tous les presens d’une ame si traistresse, Rompons ces bagues d’or, rompons la blonde tresse, Dont mon cœur par mon bras est esclave rendu, Et que tout le passé soit tenu pour perdu ; Noyons-en la memoire et l’amour tout ensemble ; Brisons ce diamant, qui si mal luy ressemble, Et brûlons ces escrits qui sembloient embrasez, Mais qui, comme son cœur, sont feints et deguisez. Ah ! je veux qu’on me saigne et qu’on m’ouvre les veines, Laissant couler le sang dont elles sont si pleines, Ce mechant sang brûlé, qui me faisait l’aimer, Et qui dans mon cerveau sçavoit si bien former Tant d’images trompeurs de façon differente, Qui tousjours pour mon mal me la rendoient presente. Plustost que ce venin hors de moy ne chasser, Je veux avec le fer son portrait effacer Du rocher de mon cœur ; car si fidelle place Ne doit tenir en soy rien tant plein de falace. Pauvre amant miserable, où te vois-tu reduit ? D’où se levoit ton jour te vient ores la nuict ; Tes soupirs sont perdus, ta foy tant estimée Dans une terre ingrate a tout esté semée, Et ne vas moissonnant, pour fruit de tes labeurs, Que regrets espineux et poignantes douleurs. Hé bien ! qu’y veux-tu faire ? Il faut t’aider toy-mesme, T’endurcir, t’obstiner et, d’un courage extreme, Resister au tourment, bien qu’il soit rigoureux, Et cesser desormais d’estre plus amoureux. Il est vray qu’une amour, qui de matiere forte S’est bastie en six ans, pour un vent ne s’emporte. Entre tes passions le combat sera grand, Mais rien n’est impossible à qui bien entreprand. Si tu veux, ce grand feu sera moins que fumée, Et presque ignoreras que tu l’ayes aimée. O dieux ! qui de nos faits reglément disposez, Et des plus affligez les ennuis appaisez, Si j’ay tousjours vescu sans fraude et sans malice, Tendez à mes soupirs vostre oreille propice, Et prenez à mercy mon esprit repentant. Je ne demande pas que son cœur inconstant M’aime comme autresfois, ny ne souhaite qu’elle (Impossible souhait) cesse d’estre infidelle. Pour fin de mes desirs, je requiers seulement Que chassiez loin de moy cet assoupissement, Et ce morne regret qui trop ferme s’y fonde, Et me fait sembler triste aux yeux de tout le monde. Privez-moy de memoire, afin qu’à l’advenir Je ne garde en l’esprit d’elle aucun souvenir, Et lors que le hazard fera que je la voye, Mon cœur ne soit esmeu de douleur ny de joye ; Qu’aucun reste de flamme en moy ne soit trouvé, Et que plus à ce joug je ne sois captivé ; Accordez ma priere, ô dieux pleins de clemence ! Tant pour vostre bonté que pour mon innocence.