Élégie II

Que je fus malheureux de me laisser reprendre ! Non, je devois mourir plustost que de me rendre, La mort m’eust été belle et favorable aussi, Veu que mesme en vivant je suis mort et transi : Je suis mort pour le bien et je vy pour la paine, D’une vie ennuyeuse, importune, inhumaine, Pleine de desespoirs, longue pour les malheurs, Et courte pour pleurer mes cruelles douleurs. Las ! j’ay fermé les yeux pour ne voir ma misere ! Devois-je pas penser que mon seul adversaire, Mon mortel ennemi justement courroucé, Amour, que ma revolte avoit tant offençé, Ne cesseroit jamais qu’il n’en eust pris vengeance, Et qu’il n’eust chastié ma folle outrecuidance ? Je le devois penser, mais je ne l’ay pas fait ; Mon orgueil et mon cœur à ce coup m’ont desfait. J’estois si temeraire et si plein de jeunesse, Que j’estimois qu’Amour n’auroit la hardiesse De se reprendre à moy, moy qu’un juste dédain Avoit tout fraichement arraché de sa main ! Aussi n’est-ce pas luy, qu’il n’en prenne la gloire. Jamais plus de mon cœur il n’eust eu la victoire ; Je l’eusse bien tousjours contre luy deffendu. C’est à vous seulement que je me suis rendu, Madame ; helas ! c’est vous qui renchainez mon ame ! Vous rafollez mes sens, vous attisez la flame Qui brûle mon esprit, tellement allumé, Qu’il ne sera long-tans sans estre consumé. Pourquoy donc ce cruel prend-il si grand’ audace ? Pourquoy me poursuit-il et me donne la chasse ? Pourquoy fait-il le brave, et se rit de me voir Encor une autre fois reduit sous son pouvoir ? Ce n’est par son effort : j’avois perdu la crainte De voir jamais par luy ma franchise contrainte. Et si de ces propos il se trouve offençé, Pour me faire advoüer que je suis insensé, Qu’il gaigne tant sur vous par force ou par priere, Que vous laschiez mon ame en vos yeux prisonniere ; Puis qu’il se mette aux champs garny d’arc et de traits, Employant les regars plus embellis d’attraits, Pourveu que je sois seur de vos yeux que j’adore, Pour voir s’il pourra bien me captiver encore ; Mais il n’en fera rien, il connoist trop mon cœur, Dont vostre seul effort pouvoit estre vainqueur. Je connoy maintenant que nostre ame divine, Tenant tousjours du ciel, lieu de son origine, Presage nos malheurs devant que d’advenir, Et nous en advertit, afin d’y prevenir ; Ou que quelque démon, ou quelque autre puissance Nous fait devant le mal en avoir connoissance. De mon mal toute chose assez m’avertissoit : Oyant parler de vous le cœur me fremissoit, Ma couleur se changeoit, mon ame estoit esmuë : Bref, je vous redoutois ains que vous avoir veuë, Comme mon ennemie, et celle qui devoit Me rendre entre les mains d’un qui me poursuivoit. Il me souvient tousjours que je mourois d’envie De voir vos yeux divins, clairs flambeaux de ma vie, Et de parler à vous ; d’autant qu’on me disoit Que le ciel vous aimoit et vous favorisoit, Qu’il se plaisoit en vous, et qu’il vous avoit faite Pour monstrer icy bas quelque chose parfaite. Or, bien que de vous voir il me fust mal aisé, Et que de ce desir mon cœur fust embrasé, L’heur qui m’accompagnoit fist tant de resistance, Que pour lors mon vouloir n’eust aucune puissance Quelque chose en chemin tousjours me retardoit ; Car lors d’un œil benin le ciel me regardoit. Il m’avoit pris en charge, et, tuteur debonnaire, Destournoit loin de moy toute chose contraire. Mais, depuis quelque tans, à mon dam j’ay connu Qu’il m’estoit sans ma faute ennemy devenu, Et que son mouvement, qui fait les destinées, Avoit changé le cours de mes claires journées. Plus d’aucun bon aspect je ne suis regardé, D’un malheureux démon mon discours est guidé, Qui, troublant ma raison de conseil depourveuë, A fait bon gré mal gré que je vous aye veuë. Et vrayment, bien qu’il soit contre moy dépité, Encor eut-il pitié de ma fatalité ; Car le jour malheureux que je vous vey si belle, Jour de mon infortune et de ma mort cruelle, Il ne fist que pleuvoir, l’air estoit tout noircy Et se tenoit couvert d’un grand voile obscurcy, Soit pour ne voir le point de ma perte prochaine. Ou qu’il portast le dueil de ma mort inhumaine : Mesme ce jour maudit, comme je m’avançé Pour sortir du logis, le pié je me blessé : Mais le malheur, que j’eus pour guide en mon voyage Fist que je ne pris garde à si mauvais presage ; Toutesfois par trois fois je voulus retourner, Et mon mal à la fin je ne peu destourner. Mais qui se fust doublé qu’Amour eut eu puissance De me ranger alors sous son obeïssance ! On dit qu’il est conçeu d’aise et d’oisiveté, Et lors un seul moment je n’estois arresté ; Mon corps et mon esprit vaguoient sans nulle cesse, Les soucis me faisoient une angoisseuse presse, Long-tans devant le jour j’en estois réveillé ; Et bref je me sentois tellement travaillé, Que j’estois las de vivre, et pensois que ma vie Aux plus cruels malheurs fust alors asservie ; Mais, lors que je vous vey, soudain je connu bien Qu’aupres du mal d’Amour tout autre mal n’est rien. Dès que je vey vos yeux, j’oubliay toute affaire, Mesme je m’oubliay ; car je ne peu distraire Mes yeux de vos regars, mes yeux me trahissoient ; Car volontairement vers vous ils s’adressoient Et, voyant flamboyer vostre lumiere sainte, Estonnez et ravis, ils vacilloient de crainte, S’en retiroient un peu, puis ils vous regardoient Pendant que tous mes sens de frayeur se rendoient, Et que cent mille esprits pleins de subtile flame Troubloient mon sang esmeu, ma raison et mon ame. Je connu bien mon mal quand mon cœur l’eut reçeu, Mais, las ! ce fut trop tard que je m’en aperçeu. Car celant ma douleur par mes yeux confessée, Je fey comme la biche alors qu’elle est blessée : Elle fuit le chasseur, mais elle ne fuit pas Le fer qui la traverse et la guide au trespas. Ainsi je vous laissay ; car j’avois esperance Qu’un mal pris en voyant finiroit par absance. O peu fidelle espoir les amans deçevant, Tu n’es rien qu’un fantôme enflé d’air et de vant ! Je retourne au logis brûlant d’ardeur cruelle, Et connu, mais en vain, ma playe estre mortelle, Et que le fer qu’Amour au cœur m’avoit caché, Par la mort seulement pourroit estre arraché. Je sentois la poison dans mes os écoulée, Qui faisoit ses efforts ; mon ame estoit brûlée, Mon cœur estoit saisi, mes esprits languissoient, Mille pensers communs dedans moy s’amassoient ; J’estois confus moy-mesme et ne sçavois que faire, Sinon de blasphemer la fortune contraire ; Puis je m’en repentois, de crainte d’offenser Ces courtois ennemis qui me font trespasser, Je veux dire vos yeux, dont la puissance sainte Fait que l’on tient Amour en honneur et en crainte. Las ! dès ce triste jour que je languis ainsi, De chose que ce soit je n’ay plus de soucy ; Je fuy tous les esbats où je me soulois plaire, Je me tiens à l’escart pour rêver solitaire Et pour penser en vous : c’est tout mon reconfort, Et rien que ces pensers n’ont empesché ma mort ; Mort que j’avancerois, veu le mal que j’endure, Mais je crain, me frappant, nuire à vostre figure, Qu’Amour dedans mon cœur grava si vivement, Qu’elle ne doubte rien, fors la mort seulement. Or, je veux donc durer pour la rendre durable, Et ne veux plus nommer mon estat miserable ; Mais je diray qu’Amour m’est un Dieu fort benin D’orner un cœur humain d’un portrait si divin Et si beau, que luy-mesme, afin qu’il le contemple. Jamais ne m’abandonne et fait de moy son temple.