Élégie I. — Que serviroit nier chose si reconnuë ?

Que serviroit nier chose si reconnuë ? Je l’advouë, il est vray, mon amour diminuë, Non pour objet nouveau qui me donne la loy, Mais c’est que vos façons sont trop froides pour moy. Vous avez trop d’égard, de conseil, de sagesse ; Mon humeur n’est pas propre à si tiede maistresse, Je suis impatient, aveugle et furieux. Pour aimer comme moy trop clairs sont vos beaux yeux. Toute chose vous trouble et vous rend esperduë, Une vaine rumeur sans sujet espanduë, Le regard d’un passant, le caquet d’un voisin, Quelque parent de loin, un beau frere, un cousin, De mille estonnemens laissent vostre ame attainte. Vos femmes seulement vous font pallir de crainte ; Et quand de mes travaux j’attens quelque loyer, Le tans en ces frayeurs se voit tout employer. D’une flèche trop mousse Amour vous a blessée. Il faut à mes fureurs quelque amante insensée, Qui, mourant chacun jour, me livre cent trespas, Qui m’oste la raison, le somme et le repas, Qui craigne de me perdre et qui me fasse craindre, Qui tousjours se complaigne ou qui m’escouste plaindre, Qui se jette aux dangers et qui m’y jette aussi, Qui transisse en l’absence et que j’en sois ainsi, Qui m’occupe du tout et que je la retienne, Et qu’un mesme penser nostre esprit entretienne ; Voilà les passetans que je cherche en aimant. J’aime mieux n’aimer point que d’aimer tiedement. L’extremité me plaist. Desirez-vous que j’aime ? Soyez en vos ardeurs comme en beautez extrême, Perdez tous ces respects qui nous ont abusez, Aveuglons les jaloux, trompons les plus rusez, Et courons les hazards. La princesse d’Eryce, Amoureuse de Mars, aux hardis est propice, Et l’esprit que la peur devant fust tenaillant, Dès qu’il sent son ardeur devient chaud et vaillant. Cette mere d’Amour, que tout estre revere, Apprend la simple fille à tromper une mere, Une tante, une garde, et doucement la nuit Se couler d’aupres d`elle, aller sans faire bruit, A tastons, à la porte et, sous l’obscur silence, Ouvrir à son amant, qui boult d’impatience ; Aux gestes et aux yeux elle apprend à parler, Et par chiffre inconnu son secret deceler ; Elle fait que la femme et jeune, et peu rusée, Le soin d’un vieil jaloux convertist en risée, Et que le cœur loyal, d’amour bien embrasé, Ne trouve jamais rien qui luy soit mal-aisé. Mais il faut que son trait profondement le touche. Ce n’est pas pour tous ceux qui l’amour ont en bouche, Que la coustume ou l’art fait paroistre angoisseux, Ou qu’une humeur pesante a rendus paresseux ; Seulement ces amans l’esprouvent favorable, Qui nourrissent au cœur un ulcere incurable, Qui bien loin ont chassé tout discours de raison, Et qu’un sage respect n’enferme en la maison. Mais comme la fureur à clos yeux les transporte, Passent cent et cent fois par devant une porte, Rodent toute la nuict, sans profit bien souvent, Et ne craignent voleurs, froid, orage, ny vent. Expert j’en puis parler, sa faveur j’ay sentie, Quand plus fort la raison s’est de moy divertie ; Quand je suis tout de flamme et que, chargé d’ennuis, Par la ville à grands pas j’erre toutes les nuits, Tousjours ceste deesse à mon secours se monstre. Les batteurs de pavé qu’aux destours je rencontre, Ne m’ostent point ma cape, et leur fer rigoureux Ne se trempe jamais dans mon sang amoureux. Le froid des nuits d’hyver ne me porte nuisance, Ni le serain, ny l’eau qui tombe en abondance ; Je ne me sens de rien, tout aide à ma santé, Pourveu qu’à la parfin, ayant bien escouté, Lasse de mes travaux, celle qui m’est si belle, Entrouvrant la fenestre, à voix basse m’appelle. O toy quiconque sois, qui te vas retirant Si tard en ton logis, ne sois trop enquerant ! Pren ton chemin plus haut, perte basse la veuë, Ne pense à remarquer ny l’endroit ny la ruë, Fay haster ton flambeau, toy-mesme avance-toy, Et ne t’enquiers jamais de mon nom, ny de moy ; Ou si sans y penser tu viens à me connoistre, N’en ouvre point la bouche et n’en fay rien paroistre. Tout mystere d’amour merite estre caché ; Qui en use autrement commet un grand peché. Toutesfois quand la langue indiscrette et mauvaise D’un sot entreprendroit de corrompre nostre aise, Il s’en faudroit mocquer : car, maistresse, aussi bien Vostre mary l’oyant n’en croiroit jamais rien. J’y ay mis trop bon ordre : une de ces sorcieres Qui commande aux esprits, hostes des cimetieres, Fort sçavante en son art, experte à conjurer, Qui pourroit des enfers Proserpine tirer, Qui sçait tous les secrets de Circe et de Medée, Et quelle heure ou quelle herbe est plus recommandée, Avec de puissans mots, par trois fois rechantez, A pour moy tous les yeux des maris enchantez. Si le vostre en mes bras vous voyoit toute nuë, Il ne croiroit jamais la chose estre advenuë. Mais sçachez que ce charme est pour moy seulemant, Et ne vous serviroit pour aucun autre amant ; Car si vous presumiez tant soit peu luy complaire, Mary, freres, voisins, sçauroient toute l’affaire. La vieille me l’a dit pour vous en adviser, Mais de toutes faveurs vous me pouvez user Et sans crainte à mes maux donner pronte allegeance ; Jamais vostre mary n’en aura connoissance. Ceste bonne devine, avec son grand sçavoir, Fait serment qu’elle peut les courages mouvoir, Soit des prisons d’Amour ouvrant toutes les portes, Soit les plus libres cœurs chargeant de chaisnes fortes. Moy-mesme en ay fait preuve, il le faut confesser. Elle m’a fait trois nuits à la lune passer. M’a fait plonger trois fois la teste en la riviere ; J’ay fait maint sacrifice avec mainte priere, Tandis que de parfums mon corps elle purgeoit, Et de noires liqueurs son bras nud m’aspergeoit. Il est vray qu’en mes vœux, ô seul but de ma vie ! D’eschapper de vos mains je n’avoy point d’envie. Je prioy seulement, d’amour tout enflammé, Qu’en vous aimant bien fort je fusse bien aimé, Que jamais nostre ardeur ne se peust voir estainte. Et que plus desormais vous n’eussiez tant de crainte. Voilà tous les souhaits qui contant me rendroient. Si le ciel n’estoit sourd, je sçay qu’ils adviendroient, Et qu’un trait plus aigu, perçant vostre courage, Vous seriez moins craintive, et moins tiede, et moins sage.