Élégie IV. — Je reconnoy ma faute et ma lourde ignorance.

Je reconnoy ma faute et ma lourde ignorance. Bien que je fusse appris par mainte experiance Que l’amour d’une femme est pronte au changement, Et que la mieux bastie a l’air pour fondement ; Bien que parmy les cris et les poignantes rages De ceux qui, chacun jour, les esprouvent volages, Je me creusse entre tous sage et fort advisé D’avoir si tost connu leur esprit desguisé, Et que j’eusse juré ne me lier qu’en celle Qui tout ouvertement s’advoûroit infidelle ; Toutesfois, à ma honte il le faut confesser, Quelque charme inconnu m’avoit sceu tant forcer, Et rendu ma raison tellement estrangée, Que je pensoy pour vous leur nature changée, Et qu’en vous seulement se fist force à la loy. Cent et cent fois le jour je disois à part moy, Voyant luire en vos yeux tant de celestes flammes, On ne peut sans pecher la mettre au rang des femmes ; Le ciel doit l’avoir faite unique en loyauté, Comme elle est sans pareille en grace et en beauté. Mais quand cette pensée eust eu moins de puissance, Helas ! eussé-je fait à la fin resistance A tant de doux attraits, qui l’esprit me voloient, Et qui tournoient mon ame ainsi comme ils vouloient ? N’eussé-je creu vos yeux et ces promesses saintes Que vous tiriez d’un cœur, le vray sejour des faintes, Joint que, pour achever de me rendre insensé, L’Amour dés nostre enfance entre nous commencé, Conservé sans naufrage en mainte grand’ tourmante, M’asseuroit que vous seule au monde estiez constante ? Vous mesme en faisiez gloire, unique à bien aimer, Jurant qu’autre que moy n’eust sceu vous allumer, Et qu’encore qu’Amour le voulust entreprendre, Il trouveroit ses feux pour vous n’estre que cendre. Le mien avoit esté vostre premier flambeau, Et vous serviroit d’astre en la nuit du tombeau. Vous en juriez vos yeux, seigneurs de ma victoire, Beaux yeux qui tant de fois le faux m’ont fait accroire ! Vous juriez vos cheveux crespement blondissans, Qui, pour me retenir, ont des nœuds si puissans ; Vous juriez la deesse en vostre ame logée. Et la foy qui n’estoit qu’à moy seul engagée ; Vous juriez cet archer qui si droit sçait frapper, Et mille autres sermens trop forts pour me tromper. Il n’en falloit point tant ; mon ame peu rusée D’un seul de vos regards pouvoit estre abusée. Las ! que le ciel cruel ne permist-il alors Que l’esprit trop constant s’envolast de mon corps ! Durant que j’estimoy vostre cœur immuable, Que le trait de la mort m’eust esté favorable ! Pour avoir trop vescu, tout mon heur j’ay perdu ; Le ciel de mes amours un enfer s’est rendu ; Mes jours les plus luisans sont changez en tenebres, Et mes chants de liesse en complaintes funebres. Quand ma foy me devoit faire mieux esperer, Je voy vostre faveur de moy se retirer, Qu’ay-je dit ? qu’ay-je fait pour soufrir tant d’outrage ? Quel nouveau changement regne en vostre courage ? Si pour me decevoir vous m’aimiez seulemant, Ce n’est pas grand honneur d’abuser un amant Qui ne croyoit qu’en vous ; vous estiez ma fiance, J’estimoy pour vous seule avoir pris ma naissance, Vous me faisiez parler, respirer et mouvoir ; N’est-ce donc vous tromper que de me decevoir ? Ah ! que de desespoirs tyrannisent ma vie ! Malheureux est celuy qui aux femmes se fie ! Pour s’en estre asseuré, mon cœur infortuné Se voit pour tout jamais à souffrir condamné, Et ne puis par raison, par tans, ny par absence, De son mal furieux douter la violence. Le souvenir me tuë, et le plaisir passé Rend de regrets trenchans mon esprit traversé ; De ma si longue amour voilà tout le salaire. Las ! pour dernier remede, ô beauté trop legere ! A qui contre mon gré mon vouloir est lié, Apprenez-moy comment vous m’avez oublié ; Et comme une amour telle, avec l’age augmentée, A peu si prontement du cœur vous estre ostée. Au lieu d’accuser plus vostre esprit inconstant, Je vous pardonne tout si j’en puis faire autant ; Car je me tiens payé d’assez grand’ recompance, Si de vous pour jamais je pers la souvenance.