Élégie IX

En la saison premiere, apres que toutes choses Furent de leur chaos ordonnément decloses, Lors que tous blancs de foy les mortels icy bas, Nouvelle œuvre du ciel, seulement n’avoient pas Entr’eux le nom de vice, ains guidez d’innoçance Faisoient bien par nature, et non par connoissance ; Amour, puissant démon, qui, le premier des dieux, Avoit franchy le sein du chaos ocieux, Ayant mis fin par tout au trouble et à la guerre, Amoureux des humains vint demeurer sur terre. Bien qu’il fust immortel, il ne les dédaignoit, Mais de jour et de nuict il les accompagnoit ; Il logeoit dans leurs cœurs, il échauffoit leurs ames, Et sous le doux effort de ses poignantes flames, Chacun, pour s’alleger, sa moitié choisissoit, Ne cessant leur amour quand ce desir cessoit. Lors tous vivoient contans ; l’amante estoit sans crainte Que sous un beau semblant logeast une ame fainte, Qu’on apprit aux soupirs quand ils devoient sortir, Et que mesmes les pleurs fussent duits à mentir ; La bouche estoit du cœur asseuré témoignage, On ne s’amusoit point à farder son langage, Ses yeux, sa contenance ; ains, sans dissimuler, Qui plus avoit d’amour, mieux en sçavoit parler. La beauté, la douceur, le mérite et l’adresse, Estoient les seuls efforts pour vaincre une maistresse, Simple et sans artifice, et qui ne sçavoit pas User selon les tans de rigueurs ou d’appas, Façonner un sou-ris, composer ses œillades, Pour rendre en se jouant les jeunes cœurs malades. Mais, qui plus est aussi, l’or n’avoit aucun pris ; Carquans, perles, rubis, n’eussent meu les espris De la moindre bergere, ains l’amitié prisée Sur toute autre richesse estoit authorisée. Mais comme peu à peu le vice s’avança, Et que cette saison en une autre passa, Et que l’or jaunissant se mit en évidence, Et que la fermeté fit place à l’inconstance, Qu’on se sceut déguiser, et qu’on sceut finement Au poids de la richesse estimer un amant ; Qu’on peut de cent façons couvrir sa fantaisie, Et du beau nom d’honneur masquer l’hypocrisie, Amour tout estonné de voir si-tost changé Un peuple, qui n’aguere estoit si bien rangé, Detestant leur malice, ainsi se prit à dire : « Il faut, il faut, dit-il, qu’ailleurs je me retire ; Ce peuple est miserable et ne connoist combien Il a par ma faveur receu d’aise et de bien. » L’effet fust aussi pront que la voix prononcée ; Car d’une aile à plein vol par le vague élancée, Il se perd dans la nuë, où, soustenu de l’air, Pour dire ces propos il cessa de voler : « Tu t’en repentiras, race ingrate et chetive, Et, regrettant trop tard le bien dont tu te prive, Reconnoistras en bref combien sont differans Les vrais contentemens des plaisirs apparans. Et combien mon ardeur, dans le ciel allumée, Brûloit plus doucement que ta vaine fumée. Car, comme tous ensemble avez fait le peché, Sur tous de ma fureur le trait sera lasché. Vous, hommes, les premiers, qui n’avez voulu suivre Le doux train des plaisirs où je vous faisois vivre, Qui vous estes lassez de la simplicité, Qui pensez par le change acquerir liberté, Pour les simples bontez qu’avez tant mesprisées, Vous aurez desormais des maistresses rusées, Au cœur dissimulé, sans foy, sans amitié, A qui le mieux aimant fera moins de pitié, Et dont tout l’artifice et la plus belle gloire Sera de vous surprendre et vous en faire accroire. Leurs regards, leurs sous-ris, leurs gestes, leurs propos Seront tous façonnez contre vostre repos ; Ores vous retenant, si l’espoir vous emporte, Ores vous donnant cœur, si la crainte est trop forte, Puis de nouveaux soucis vos esprits martelant, Et tousjours aux glaçons la flamme entremeslant, L’absynthe avec le miel, la joye à la tristesse, Et parmy les attraits une grande rudesse ; Afin que vostre esprit, par la diversité Confus et chancelant, soit tousjours agité. Combien lors, forçenez, aurez-vous de martire ? Combien de foux propos alors sçaurez-vous dire ? Combien de juremens de ne plus les revoir, Qui n’auront toutesfois un moment de pouvoir ? Car il ne faudra rien qu’une larme contrainte, Un regard pitoyable, une parole fainte, Pour plus fort vous reprendre, et croire fermement Ce que vous aurez veu n’estre qu’enchantement. Lors pour plus me venger je changeray mes flèches, Mon carquois et mon arc, et feray mille brèches Diverses en vos cœurs, et non comme autresfois, Quand vous reconnoissiez mon empire et mes loix. « Cestuy celle aimera qui ne sera point belle, Et l’autre celle-là qui fera la rebelle Sous le voile d’honneur, et ne doutera pas D’en tenir toute nuict un autre entre ses bras, Tandis que le chetif dans son ame piquée Adorera Lamie en Lucrece masquée. L’autre à bon droit craintif, l’inconstance doutant, Bien qu’il soit jouyssant, ne sera pas contant ; L’autre sera prodigue afin qu’on le guerdonne, Et ne connoistra pas que celuy qui plus donne En doit avoir le moins, afin qu’en esperant Pour parvenir au but, on ait le demeurant ; Bref, je vous feray voir si l’homme est miserable, Qui vit dessous le joug de la femme muable, Afin que souffriez ce qu’avez merité, Pour avoir un grand dieu folement despité. « Et vous, dames, et vous, qui n’avez tenu conte De la force d’un dieu qui tous les dieux surmonte, C’est à vous que j’en veux, pour vous faire sentir Si de se prendre à moy l’on se doit repentir ; C’est à vous que j’en veux, qui avez preferée A la sainte amitié la richesse dorée, Le vice à la vertu, l’ignorance au sçavoir, Et l’orde convoitise au fidelle devoir, Et n’avez estimée estre chose vilaine Du revenu du lict accroistre son domaine. Vous ne jouyrez plus du doux contentement, Qui provient de l’amour qu’on sent également ; Vous aimerez les grands à cause des richesses, Et les grands, comme vous, sçauront mille finesses Pour vous amadouër ; car, en tous leurs discours. De constance et de foy vous parleront tousjours, Pour parvenir au but où l’amoureux aspire, Puis, leur desir finy, ne s’en feront que rire, Changeront de pensée et vous delaisseront, Et par mesmes appas autres pourchasseront, Pour monstrer leur adresse, et pour avoir la gloire De triompher sur vous d’une pauvre victoire. « Tout ainsi que l’on voit le chasseur qui poursuit Ardant, impatient, le lievre qui s’enfuit, Ores sur la montagne, or’ à travers la plaine, Et pour bien peu de chose il prend beaucoup de paine, Car la chasse luy plaist, et le plaisir qu’il prend, Mille et mille fois plus que ce qu’il en attend. « Ainsi seront les grands en l’amoureuse chasse, Qui n’espargneront rien pour gaigner vostre grace, Soupirs, pleurs, ni sermens, puis, dès qu’ils vous tiendront, A quelque autre beauté leurs filets ils tendront. « Vous alors, qui verrez leur foy dissimulée, Et leur amitié sainte au vent s’en estre allée, Bien que mon feu divin vostre cœur n’ait espoint, Et que de vraye amour au dedans n’ayez point, Vous aurez de despit l’ame toute embrasée, Voyant vostre beauté si soudain mesprisée, Et brûlerez de rage, alors qu’on vous dira Que de ce nouveau bien quelque autre jouyra ; Car je veux, pour monstrer les forces de mon ire, Que vous vous efforciez l’une à l’autre de nuire. » Ainsi crioit Amour, qui son aile estendit, Puis d’un vol redoublé dans les cieux se perdit ; Et par nostre malheur sa menace effroyable, D’âge en âge depuis, apparut veritable. Vous le sçavez, madame, helas ! vous le sçavez, Et de sa prophetie experience avez ! Car vous avez esté de la grandeur esprise, Et vous avez des grands esprouvé la feintise ; Et, bien que vos beaux yeux, ardans flambeaux d’Amour, Surmontent la clarté qui nous donne le jour, Bien que vostre beau teint fasse honte à l’aurore, Que l’or de vos cheveux l’or mesme decolore, Qu’un yvoire poly vous finisse la main, Que des Graces ayez la poitrine et le sein, Et que tant de vertus, qui vous font admirable, Eussent pouvoir de rendre immortelle et durable La plus legere foy, vous avez nonobstant Senty le changement d’un courage inconstant, Qui desdaigne le bien d’une amour mutuelle, Pour suivre aveuglement une beauté nouvelle. Mais vous devez cesser de vous en tourmanter ; Encor que vous voyez une autre s’en vanter ; Car un tout tel destin que le vostre s’appreste, Pour celle qui si haut fait sonner sa conqueste.