Élégie V

Pour gage de ma foy, qui vous est dédiée Tout le tans que ceste ame au corps sera liée, Et mesme apres la mort, puis qu’apres le trespas Dure le souvenir des choses d’icy bas, En vous offrant ces vers, je vous offre, madame, Mes yeux, mon sang, mon cœur, mes esprits et mon ame. Et davantage encor, si j’ay quelque pouvoir : Faites moy tant d’honneur que de le recevoir Comme vostre qu’il est, bien que vostre merite Ne doive faire cas d’offrande si petite, Si vous ne mesurez mon vouloir qui me rand, Se dédiant à vous, audacieux et grand. Vous n’estimerez point, s’il vous plaist, que je pense Faire avec du papier preuve de ma constance, Et qu’en le faisant plaindre, et me plaignant aussy. Je vous veuille encherir mon amoureux soucy, Adjoustant aux douleurs dont mon ame est chargée, Depuis que sous vos loix vous la tenez rangée. Non, je ne le veux point : il faut que mon devoir, Mon service et ma foy vous le fassent sçavoir, Et que l’effort du tans, qui perce tout nuage, Découvre si mon cœur est constant ou volage ! Ce que je vous requiers pour mon plus grand desir, C’est que sans passion vous preniez le loisir De me voir endurer, en vous faisant la preuve Qu’une si ferme amour que la mienne on ne treuve. Et si vous en doutez, pour le commencement Ignorez si mon mal est foible ou vehement, Et, sans jetter les yeux sur ma brûlante flame, Permettez que sans plus vostre je me reclame, Afin que cet adveu, dont je veux m’honorer, Me fasse plus constant les tourmens endurer. Et je suis asseuré que le tans qui tout brise, Ne pouvant ébranler ma foy trop bien assise, Fera de vostre cœur la douceur approcher, Ou dedans l’estomach vous auriez un rocher Et le cœur inhumain d’une beste cruelle. Or, en vous connoissant si divine et si belle, Je ne le puis penser, veu que la cruauté S’accompagneroit mal de si rare beauté. Toutesfois quand du ciel la maligne influance, Quand la loy du destin qui, depuis ma naissance, Forte me tyrannise, et quand vostre rigueur Empescheroient le bien que dessert ma langueur, Et quand pour le loyer de mon amour extrême, Et quand pour vous cherir cent fois plus que moy-mesme Je ne recueilliroy que l’ennuy d’un refus, Et que de vos beaux yeux je partiroy confus Pour avec desespoir mettre fin à ma vie : Si n’auroy-je regret de vous avoir servie, Car je tiens cet honneur pour un si grand loyer, Que cent mille trespas ne le sçauroient payer. Voilà comment, madame, il ne se sçauroit faire, Que d’adorer vos yeux je me puisse distraire. Ne m’alleguez donc point que je puis bien penser Que vous n’avez pouvoir de me recompenser, A cause de la loy dont vous estes estrainte : Car en fin cette loy n’est ny juste ny sainte, Loy qui, comme Mezence, horrible en cruauté, Joint avec un corps mort si vivante beauté, Saturne avec Venus, et la gaye jeunesse Aux chagrins deplaisans d’une froide vieillesse. Si la loy vous retient, vous n’avez pas raison, Car l’amour et la loy sont sans comparaison. Amour est un démon de divine nature ; Immortels et mortels sentent tous sa pointure, Elle est sans privilege : or si l’Amour est dieu, Jamais l’humaine loy contre luy n’aura lieu ; Car il faut qu’au plus grand tousjours le petit cede, Et la loy des amours toutes les loix excede. Et davantage encor la nature est pour moy, La nature est tousjours plus forte que la loy, Et quand nature parle et monstre sa puissance, Adieu toutes les loix et l’humaine deffance. Quand donc en vos rigueurs ainsi vous persistez ; Vous pechez contre Amour à qui vous resistez, Vous voulez que son feu n’ait puissance en la terre : C’est en fin des geans renouveler la guerre, C’est combatre le ciel d’un orgueil indiscret, C’est vous priver d’un bien où vous aurez regret. Si vous vous arrestez, doutant de ma constance, Estimez, s’il vous plaist, qu’ayant ceste asseurance, Qui me rendroit d’Amour satisfait et coutant, Je n’auroy le pouvoir de vous estre inconstant ; Et bien qu’auparavant j’eusse eu l’esprit volage, L’amour et le devoir retiendroient mon courage. L’homme est pire qu’un tigre aux déserts allaité, Qui perd l’affection pour se voir bien traité. Nous devons mieux aimer, plus d’amour on nous porte : Quand deux feux sont conjoints, la flamme en est plus forte. Et davantage encor par ce point desiré, D’un vouloir mutuel me voyant asseuré, Je pourroy beaucoup mieux d’une façon discrette Rendre aux plus curieux nostre flamme secrette. Ce qu’à mon grand regret, or’ helas ! je ne puis, Or’ estant assailli de mille et mille ennuis, Flottant incessamment entre l’aise et la paine, Entre le desespoir et la joie incertaine, Et si vivement point de ma grand’ passion Que je ne puis user d’aucune fiction. Au lieu qu’en ce doux tans je n’auroy point de crainte D’un dedain, d’un refus ou d’une chose fainte ; Mais, joyeux et coutant, il me seroit aisé De couvrir cet amour d’un habit deguisé, Sans que les medisans, les jaloux, ny l’envie, Peussent donner atteinte à nostre heureuse vie. Voilà ce que l’ardeur m’a fait vous adresser, Adjurant vos beaux yeux de ne s’en offenser ; Car j’écry tout cecy, forcé de la puissance Du dieu qui m’a rangé sous vostre obeïssance. Si j’ay fait quelque erreur, je vous prie excuser ; Si j’ay dit verité, je vous prie en user, Et vous representer si je dois estre en paine, Mourant d’extrême soif aupres de la fontaine.