Élégie V. — Le jour, non jour pour moy, mais nuict tres-malheureuse

Le jour, non jour pour moy, mais nuict tres-malheureuse, Que du ciel despite la loy trop rigoureuse Me força de resoudre à quitter, furieux, Pour jamais Cleonice, ainçois mes propres yeux, Et que l’amour d’un prince, à mon dam trop extrême, Me fist fendre en deux parts et m’oster à moy-même, Quels tragiques regrets, quels tourmens, quelles morts, Egalerent jamais ce que j’enduray lors ? Au seul ressouvenir tout le corps me frissonne ; Une horreur me saisit, ma memoire s’estonne, Mes esprits sont glacez, mon œil est obscurci, Et sans pouls ny couleur je suis comme transi. Estant donc arresté qu’une absence éternelle Seroit le seul loyer de mon amour fidelle, Et qu’il falloit partir, sans jamais revenir, Du lieu qui tout entier m’avoit sceu retenir ; Je taschoy d’appaiser mes fureurs insensées. En leur ramentevant les fortunes passées, Tant de cris, tant de pleurs, tant de maux endurez ; Et que les cieux peut-estre, en mes vœux implorez, Ordonnoient cet exil d’un advis pitoyable, Pour guarir mon ulcere autrement incurable. Mais, ô foible remede ! ô dolent reconfort ! Jamais un moindre mal n’est vainqueur d’un plus fort. Toutes les passions et les peines senties Sembloient roses et lys aupres de ces orties ; Et de mes jours passez les plus desesperez Estoient à chauds soupirs de mon cœur desirez. Je les contoy sans cesse, et ma triste memoire, Des maux plus signalez me retraçant l’histoire, Faisoit que mon esprit à quelqu’un s’arrestoit, Pour le parangonner au deuil qui m’emportoit, Et disoy tout en pleurs : O momens souhaitables ! Qu’autres-fois mes ardeurs trouvoient insupportables, Quand celle à qui je suis malgré sa volonté, Me cachoit ce bel œil dont le jour est donté. Que ne revenez-vous ? Je prendroy patience D’endurer, non un jour, mais un mois son absence. Pourveu qu’on me permist de languir seulement Près du lieu qui retient tout mon contentement, Et d’avoir cette grace au regret qui m’entame De voir au moins de loin le sejour de mon ame. Mais mon destin l’empesche, et ne veut endurer Que l’ombre d’un plaisir puisse en moy demeurer. Que vous fustes cruels, parens de ma maistresse, De ne me tuer pas, quand la langue traistresse Des jaloux contre moy vostre sang allumoit, Et de meschans propos nos amours diffamoit ! Ah ! que je me repens qu’en la nuit solitaire, Dans un lieu destourné, propre à vostre colere, Ne me sois d’un grand cœur à la mort avancé, Irritant, dédaigneux, vostre esprit offancé ! Aussi-tost, j’en suis seur, respect, crainte ou menace N’eust empesché ma dame à courir sur la place, Mesler de pleurs mon sang, mes paupieres serrer, Voire avecques mon corps son esprit enterrer ; Où, las ! sous un autre air la mort me venant prendre, Un soupir seulement je n’en dois pas attendre. Aussi je n’en suis digne, ayant si tard vescu Que par un sot devoir mon amour soit vaincu. De mille autres pensers une troupe infinie, Et tous les jours passez les plus noirs de ma vie, Comme oiseaux de la nuict devant moy revoloient, Qui mon present malheur tant soit peu n’egaloient ; Soit qu’il me ressouvinst de ces tans miserables Que l’aspre jalousie, aux regards effroyables, De soupçons traversans mon esprit entamoit, Et du verre et des cloux dans mes playes semoit ; Soit quand les fiers courroux de ma belle inhumaine Presageoient quelque orage au doux fruit de ma paine; Soit quand maint faux rapport, qui son œil m’eclipsoit, D’un hyver dangereux mon espoir menaçoit. Bref, toutes les douleurs en aimant supportées, Une à une en mon cœur estans represantées, Luy faisoient confesser, plus vivement attaint, Que d’Amour autresfois à tort il s’estoit plaint. O tans ! qui du haut ciel la vitesse mesures, Las ! retourne, disoy-je, à mesurer les heures, Et les points de ma vie ; et si le ciel tousjours, Eternel en travaux, refait de mesmes tours, Recourant de rechef par la mesme carriere, Fay voir à mes amours leur fortune premiere ; Fay que la mesme source et les mesmes douleurs Me fournissent encor de sanglots et de pleurs. Las ! tu reviendras bien, et la suite ordinaire Du grand ciel te fera ton voyage refaire, Voyage qui finist et renaist tout d’un point ; Mais mon age passé ne retournera point. De mes jours amoureux la course est achevée, Au chemin de la mort ma vie est arrivée, Entre les desespoirs, l’horreur, le repentir ; Heureux, si par ma fin j’en puis bien-tost sortir ! De mille autres regrets j’eusse plaint ma fortune, Mais le tans me pressoit, et la tourbe importune Des bateliers crians m’empeschoit le loisir D’honorer de mes pleurs ce mortel desplaisir. Je sors donc de ma chambre, hasté de cette escorte, Et d’un pié desfaillant je passe outre la porte ; Puis en m’y retournant tout palle et tout transi, Pour le dernier adieu je luy disois ainsi : Chambre à mon dueil secret autresfois si propice, De mes jeunes desirs la fidelle nourrice, Ma chere secretaire, à qui je n’ay caché Trait de joye ou d’ennuy qui m’ait jamais touché, Je me plaignois à toy des rigueurs de ma dame, Je te monstrois à nu les playes de mon ame, Je ne te celoy rien ny dessein ny penser Suis-je pas malheureux qu’il me faut te laisser ? A qui plus desormais conteroy-je mes paines ? Quels antres, quels rochers, quels bois, quelles fontaines Des lieux plus egarez, où perdu, je m’en vois, Fidelles, garderont les soupirs de ma voix ? Mais, ô cher monument de mon mal deplorable ! Tu ne suffisois pas ; je suis si miserable, Et le ciel fait sur moy tant d’orages pleuvoir, Qu’en ton sein tous mes maux lieu ne pouvoient avoir ; Il faut qu’en mille endroits leur desbord se respande, Qu’il n’y ait coin du monde où mon cry ne s’entande, Val, mont, plaine, caverne, oyseaux, bestes, poissons, Qui ne plaignent ma perte en diverses façons. Tu ne me verras plus, sous l’aimable silance Des solitaires nuicts, me mettre à la cadance Du troupeau d’Eleuthere et, soigneux de leurs pas, Perdre en ces vains plaisirs le somme et le repas. Ma fortune a de moy leur faveur estrangée, Ma source d’Hippocrene en Cocythe est changée, Mon myrthe et mes lauriers cyprez sont devenus, Les destours d’Helicon ne me sont plus connus, Apollon me desplaist, tous ses dons je refuse ; Estant laissé d’Amour, peu me chaud de la Muse ! Et rien d’elle à present ne me peut contenter, Que les vers qui sçauroient mes obseques chanter. Or comme en ces discours mon esprit se distille, Le jour trop clair me force à sortir de la ville, Pour me rendre au bateau qui devoit m’enlever, Et de l’ame et du cœur sans pitié me priver. Aussi-tost les rameurs trop pronts à mon dommage, Fendans l’eau d’avirons, m’esloignent du rivage, Où fiché je regarde, et mes yeux obstinez, Sans ciller, vers le Louvre estoient tousjours tournez. Pour le voir plus long-tans sur les pieds je me dresse, Maudissant des vogueurs l’importune vitesse, Et me reputant lasche et de cœur desnué, Que plustost que partir je ne m’estoy tué, Et, victime propice au feu qui me devore, Sanglant je n’estoy cheu près l’autel que j’adore. Bien-heureux, ce disoy-je, à qui les cieux amis D’une ville si belle ont le sejour permis, Non pour les bastimens dont elle est si hautaine. Non pour y voir la cour, le palais ou la Seine, Ny de tant d’habitans le reflus nompareil, Mais pour estre esclairez des yeux de mon soleil, Et pour voir des beautez l’exemplaire et l’idée, En ce lieu des Amours et des Graces guidée. Puisse-je encor un coup si grand heur recevoir, Et jamais plus n’ouyr, ne parler ny ne voir ! J’accroissoy de ces plaints le regret qui me tuë, Quand du tout le chasteau se desrobe à ma veuë. Ce fut lors qu’à plein bras la douleur m’assaillit ! Un tremblement me prit, le genouil me faillit Et la mort si souvent à mon aide implorée, Vint s’apparoistre à moy, have et desfigurée ; Je la vey, c’estoit elle, et je la reconnu, Telle elle est aux mortels quand leur jour est venu : A cet horrible aspect mon ame espouvantée Quitta son corps perclus, la voix me fut ostée, Mon visage et mes yeux ternirent leur couleur, Et tombay comme un tronc sans force et sans chaleur. Ce qui m’advint depuis est aux autres notoire, Car du bien et du mal je perdy la memoire ; Je ne sçauroy parler du secours des rameurs, De l’eau qu’on me jetta, de l’effroy, des clameurs ; Bref, je ne m’apperceu de rien qu’on me sceut faire, Tant que je fusse mis dans ce lieu solitaire, Où mes sens defaillis ayant repris vigueur, J’en despite le ciel et maudy sa rigueur, Sçachant que rien n’est propre à mes maux incurables, Que la mort, seul recours des amans miserables.