Élégie VI

Celuy qui n’aime point, ou qui n’a point aimé, A le cœur tout autour de rochers enfermé ; Il est tout despoüillé d’affections humaines, Il n’a point de poumons, ny de sang, ny de veines, Et ne merite pas que le bel œil du jour Luise aux siens, desdaignez des lumieres d’Amour. Or de moy qui n’ay point de roc en la poitrine, Qui ne suis point conceu des flots de la marine, Animé d’un beau sang, d’un esprit et d’un cœur, Je reconnoy Amour pour maistre et pour vainqueur, Et, quand de luy desplaire il me prendra l’envie, Que les flammes du ciel mettent fin à ma vie ! Encor qu’en le suivant et vivant amoureux Je sois diversement heureux et malheureux. Vrayment je suis heureux, il faut que je l’advouë, Et que des loix du ciel hautement je me louë, De ce que le destin, captivant ma raison, L’ait au moins asservie en si digne prison ; Et tant selon mon gré m’ait rendu tributaire, Que son decret forcé m’est un choix volontaire. Car tout le plus parlait qui peut mieux contenter L’œil, l’oreille et l’esprit, jusqu’à faire gouster Icy bas des douceurs qui ravissent les ames, Se rassemble au sujet d’où ruissellent mes flames ; Et c’est ce qui me fait bien heureux estimer Sentant d’un trait si beau ma poitrine entamer, Et me plais dans le feu dont j’ay l’ame embrasée, Comme une jeune fleur s’égaye à la rosée. Mais, si de ce penser naist mon ravissement, Il donne à mes ennuis vie et nourrissement ; De mon esprit confus c’est la guerre incertaine. Deux ruisseaux différens coulent d’une fontaine, L’amertume et le doux, la joye et la douleur : Ce qui me rend heureux fait naistre mon malheur, Car l’heur qui jusqu’au ciel rend mon ame élevée, C’est quand je me souviens comme elle est captivée, Et que mon premier vol s’est si haut élancé, Que des plus braves cœurs tout dessein j’ay passé Et, sans aucun respect de crainte ou de menace, Jusqu’au troisiesme ciel j’ay poussé mon audace. Or si par les desirs le courage est jugé, Quel desir fut jamais si dignement logé ? Veu que l’enfant Amour, fait nouveau Promethée, Du ciel pour m’embraser a la flamme empruntée. Suis-je donc pas heureux de m’estre ainsi rendu ? Jamais homme avant moy ne s’est si bien perdu. Certes, je reconnoy que c’est un heur suprême, Mais il est tallonné d’un malheur plus extrême, Et les mordans soupirs, qui tiraillent mon cœur, Font que le desespoir s’en rend du tout vainqueur : Car quand cent fois le jour je remets en memoire De celle à qui je suis le merite et la gloire, Les beaux lys de son teint, ses propos gracieux, La puissance des traits que decochent ses yeux, La douce majesté qui luit dessus sa face, Et sçachant d’autre part sa grandeur et sa race, Helas ! je connoy bien que j’ay trop entrepris, Et qu’un aveuglement a saisi mes esprits, Que mon vol est trop haut, et que ceste arrogance D’Icare ou des geans attend la recompanse. Toutesfois, le sçachant, je ne puis me ravoir, Et plus je vay avant, plus j’en pers le pouvoir ; Car quand le desespoir me donne quelque attainte, La figure en mon cœur si divinement painte S’offrant devant mes yeux, me fait perseverer Tant que le desespoir ne m’en peut retirer, Bien que trop importun sans cesse il me travaille, Et que mille pensers me livrent la bataille. Las ! si tost que je suis à part moy retiré, Quelqu’un de ces pensers contre moy conjuré Me dresse l’écarmouche et va pressant mon ame, Me proposant tousjours la grandeur de ma dame ; Il met devant mes yeux les biens et les honneurs, La race et les vertus de tant de grands seigneurs, Desireux comme moy du bien qui me tourmante, Et qui n’ont peu jouyr du fruit de leur attante. Chetif (ce dy-je alors), que veux-je devenir ? Osé-je bien penser de pouvoir parvenir Jusqu’à si haut degré pour chose que je face, Apres tant de seigneurs grands de biens et de race ? Et sur ce desespoir, qui me presse et me point ; Helas ! c’est fait de moy, je ne me connoy point, Je fay mille discours, je rève et me dépite. Maudissant le malheur où je me precipite, Je me plains de l’Amour, d’où me vient ce souci, Je regarde le ciel comme un homme transi, Cependant que mes yeux, sources de mon dommage, Coulans de larges pleurs, m’arrosent le visage. Las ! si pour bien aymer on estoit avancé, Je sçay que je seroy sur tous recompensé, Et ma longue douleur, peine et perseverance M’éleveroient au bien dont je pers l’esperance ; Car je me puis nommer unique en loyauté, Comme vous estes seule en grace et en beauté, Et mon amour extrême est comme mon martire : Plus l’esprit en discourt, moins la bouche en peut dire, Est-ce pas bien aimer que de ne rien penser Qu’en la fiere beauté, qui me fait insenser ? Vivre du seul objet dont la rigueur me tuë, Voir renforcer ma foy plus elle est combattuë, Servir d’ame et de cœur sans espoir d’aucun bien, Desirer toute chose et ne demander rien, Discourir sans discours, estre vaillant de crainte, N’avoir dedans l’esprit qu’une figure emprainte, Pour un mot de travers souffrir mille trespas, Quitter pour un martel et repos et repas, Ne sentir des desdains mon ardeur refroidie, Et courir à la mort fuyant la maladie. Telles sont mes amours, tels sont mes passetans ! Cependant, misérable, aucun bien je n’attans ; Mais plus je continuë en ma course premiere, Plus mon chemin s’esloigne et me trouve en arriere. Las ! pour comble d’ennuy, je ne puis me tenir De penser au malheur qui me doit advenir ; Et ce qui plus me trouble et renforce ma plainte, C’est lors que je prevoy qu’il faudra par contrainte Que ce divin esprit, dont je suis detenu, S’assujettisse aux loix d’un peut-estre inconnu, Et cede à la coustume aux amans si contraire, Qui l’or et la richesse au merite prefere. Mais plustost que de voir ce desastre approcher, Que le ciel me transmuë en pierre ou en rocher ! Aussi bien s’il advient, ma douleur excessive Ne souffrira jamais qu’une heure apres je vive. Toutesfois quand le ciel, pour m’outrager plus fort, Envieroit à mon mal ce dernier reconfort, A l’instant pour jamais je quitteroy la France, Comme indigne de voir vostre aimable presance, Et m’en iroy choisir, triste et desesperé, Aux pays plus perdus quelque lieu separé, Sauvage, inbabilé, desert et solitaire, Pour maudire à mon gré la fortune adversaire. Et passerois ainsi le reste de mes jours, Compagnon des lions, des serpens et des ours. Il est vray que je veux, quelque ennuy qui m’avienne, Que de vos yeux divins sans cesse il me souvienne ; Car, parmy les rochers et les antres secrets, Le matin et le soir, en faisant mes regrets, J’apprendray vostre gloire aux murmurans rivages, Aux oyseaux passagers et aux bestes sauvages, Qui viendront pour m’ouyr des forests d’alentour, Et plaindront en longs cris ma peine et mon amour. Quand je n’en pourray plus et que ma voix lassée Sera de trop crier enroüée et cassée, Je m’en iray choisir les arbres les plus droits, Pour graver sur l’escorce en mille et mille endroits Ce beau nom que j’adore, entre tous admirable, Qui me fait estimer mon travail agreable. Mais je suis trop certain qu’un tel esloignement Ne me souffriroit pas vivre si longuement ; Car du feu de vos yeux ma vie est allumée, Qui sera, les perdant, esteinte ou consumée.