Élégie VII

Comme dedans un bois enrichy de fueillage, D’herbes, d’eaux et de fleurs, et tout couvert d’ombrage, Se branchent les oyseaux esmaillez de couleurs, Soupirans doucement leurs plaisantes douleurs ; Comme on voit dans un pré les fleurettes nouvelles Monstrer comme à l’envy leurs beautez naturelles, Ainsi dedans un cœur hautain et genereux Se retirent tousjours les desirs amoureux, Les douces passions, les delectables peines, Et les cheres langueurs dont les amours sont pleines, Qui ne doivent jamais un amant retenir, Veu qu’un grand bien ne peut sans travail s’obtenir. Un cœur noble et gentil sans amour ne peut estre, Car avecques l’Amour Nature l’a fait naistre, Les a liés ensemble et les joint tellement, Qu’ils demeurent tousjours inseparablement, Comme le beau soleil et sa lumiere claire, Comme l’ombre effroyable et la nuict solitaire, Comme la flamme vive et l’ardante chaleur, Comme l’humide et l’eau, la fièvre et la douleur. Bref, quiconque est bien ne sent tousjours dedans l’ame L’inévitable effort de l’amoureuse flame, Qui ne reçoit jamais de refroidissement. Car la parfaite amour dure éternellement ; Mesme alors qu’il advient qu’elle a son origine D’une perfection dont la forme est divine, Qui la rend immuable et son cours arresté ; Car si rien est constant, c’est la divinité. Et voilà ce qui fait que l’Amour que je porte A vos beautez, madame, a la trempe si forte Que le tans ny la mort ne la pourroient changer, Ni vostre rigueur mesme autre part la ranger. Aussi, pour dire vray, mon amour j’ay fondée Sur la perfection d’une si belle idée, Qu’il semble que le ciel en elle ait tout compris, Pour ravaler l’estime et l’orgueil de Cypris, Et qui, sillé d’erreur, ne le voudra pas croire, Qu’il vienne voir vos yeux, causes de la victoire Que vous avez sur moy, dont je m’estime heureux, Bien qu’ils me soient à tort quelquesfois rigoureux : Yeux où l’enfant Amour tient son celeste empire, Yeux où le beau soleil tous les soirs se retire, Yeux, les lampes du jour, aux rayons gracieux, Qui font honte à la lune et aux astres des cieux, Qui font en mesme point vivre et mourir ensemble, Qui font qu’en les voyant l’ame soupire et tremble, L’œil esperdu s’égare, et tout soudainement On perd sa liberté sans connoistre comment. Qu’il vienne voir apres l’or de vos tresses blondes, Soit quand vous les laissez flotter comme des ondes, A l’abandon du vent, qui s’empestre dedans Les filets blonds dorez de vos cheveux pendans ; Soit quand vous les tenez sur le chef amassées, Les ayant par devant ordonnément dressées, Ou qu’avec un bonnet vous nous representez D’Hylas ou d’Adonis les célestes beautez. Qu’il vienne voir ce front, large table d’yvoire, Plaine, claire et polie, où l’Amour à sa gloire Tient appendus devant les noms et les escus De tant de chevaliers heureusement vaincus. Le mien s’y reconnoist le plus haut de la bande, Et pense avoir acquis une gloire bien grande D’avoir vaincu celuy qui libre se gardoit, Et qui sans obeyr à chacun commandoit. Mais ce m’est grand honneur pour vainqueur reconnoistre Un dieu des plus grands rois le monarque et le maistre, Et lequel nonobstant tout seul ne m’eust donté, S’il n’eust eu pour secours vostre unique beauté, Beauté vrayment parfaite et tellement extrême, Qu’elle peut prendre Amour et le vaincre luy-mesme, Ainsi qu’elle m’a pris, qui ne fey nul effort, Sçachant que mon pouvoir ne seroit assez fort. Las ! que depuis ce tans j’ay passé de traverses, Que j’ay souffert d’ennuis et de peines diverses, Qui, troublant mon repos, toutefois me plaisoient, Quand je voyoy vos yeux, deux soleils qui luisoient Au centre de mon ame, et que, par leur présance Mon cœur se nourrissoit d’une douce esperance ! Mais, lorsqu’il me falut de la cour separer Et, pressé du devoir, au camp me retirer, Où j’estois attendu d’une puissante armée, Que mon œil pouvoit rendre au combat animée, Dieu sçait les passions qu’il me falut sentir ! Mais, voyant que l’honneur me forçoit de partir. Je m’en allay sans cœur, sans esprit et sans vie, Que je vous delaissay pour en estre servie ; Et demouray, chetif à part moy languissant, Le ciel comme ennemy sans repos maudissant, Accompagné d’Amour, qui tout remply de rage, Me faisoit sans cesser quelque nouvel outrage : Dieu sans miserieorde, importun, furieux, Qui pour me travailler me suivoit en tous lieux, M’accompagnoit par tout, me livroit mille allarmes, Et ne doutoit l’effort de dix mille gendarmes, Ni de tant de soldats que j’avois à l’entour, Sans me pouvoir garder des embusches d’Amour, Amour qui n’avoit seul l’entreprise dressée, Car il estoit suivy d’une troupe amassée De pensers ennemis qui cruels m’assailloient, Et de jour et de nuict mon esprit travailloient. L’un me faisoit songer à ma perte advenuë, L’autre rendoit ma vie en espoir maintenuë, L’autre me faisoit peur, l’autre, plus gracieux, Vos divines beautez offroit devant mes yeux. Mais, quand j’estoy charmé d’objet si desirable, Mes maux se faisoient doux, tout m’estoit favorable, L’aise enyvroit mon ame, et m’estimoy heureux D’estre idolatrement de vos yeux amoureux, Souhaitant pour tout bien l’heure tant attenduë Par qui vostre beauté devoit m’estre renduë, Et que, sans plus me voir de pensers enchanté, J’échangeasse à la fin l’ombre à la verité. Or j’ay si fort contraint le ciel par ma priere, Que je voy de rechef vostre belle lumiere ; Je revoy les thresors de vostre poil doré, Les lys de vostre teint de roses coloré ; Je revoy le coral de vos levres jumelles, Qui ouvrent en riant des perles naturelles ; J’entr’oy ces doux propos qui me retiennent pris, Qui ravissent mes sens, qui charment mes espris, Et bref, vous contemplant, bien-heureux, j’imagine L’entier contentement de la troupe divine. Je jouys icy bas de la gloire des cieux, Et d’un homme mortel je suis égal aux dieux Sinon de ce point seul que leur oye est durable, Et moy, dès que je pers vostre veuë adorable, Mon bien leger s’envole aussi-tost que le vant, Et ma douleur me presse ainsi qu’auparavant. Mais je m’estime heureux de vivre en telle sorte, Pourveu que vous sçachiez l’amour que je vous porte Que vous preniez mon cœur, lequel vous est offert, Que vous plaigniez le mal que pour vous j’ay souffert Et que je souffre encor, de la playe cruelle Que je receu, le jour que je vous vey si belle : Que vous vous asseuriez de ma fidelité, Et que tous mes propos ne sont que verité. Croyez qu’un noble cœur est franc de tromperie ; Il demeure immobile, et jamais ne varie, D’aucune fiction il ne sçauroit user. Car la parfaite amour ne se peut déguiser. Joint que tant plus qu’un prince est grand et remarquable, Plus il se doit monstrer entier et veritable.