Élégie VIII

De tous ceux qui d’Amour ont senty la rudesse, Aggravez sous le joug d’une ingrate maistresse, Et qui pour le loyer d’avoir perseveré Ont par sa cruauté maint supplice enduré, Il ne s’en trouve point que ce dieu plein de rage Ait battu plus que moy de tempeste et d’orage, Ne qui plus justement se puisse lamenter D’avoir comme sa foy veu sa peine augmenter. Il m’a tousjours choisi pour butte à sa colere, Il m’a tousjours pressé comme son adversaire, Sans me donner relâche, et sans que mon devoir Ni mes longues douleurs l’ayent peu desmouvoir, Ni fléchir la rigueur de sa haine obstinée Contre ma patience, à souffrir condamnée. Il est vray que quand seul j’estoy maistre de moy, Rejettant dédaigneux son empire et sa loy, Il sucroit son absynthe, et sous un doux visage Recelloit la rigueur de son mauvais courage ; Et pour mieux deguiser sa fiere cruauté, Il offrit à mes yeux vostre unique beauté, Riche d’attraits subtils, de regards et de flame, Qui percerent mon cœur et vollerent mon ame. Mais ce tourment nouveau m’estoit plaisant et doux, Tant j’aimay dès ce jour tout ce qui vient de vous ! Joint que bien tost apres vous eustes connoissance Combien pour vous aimer j’enduroy de souffrance ; Et vous, comme deesse encline à la pitié, Eustes le cœur touché d’un rayon d’amitié, Me recevant pour vostre, et prenant davantage Le mien qu’au mesme instant je vous laissay pour gage, Lequel, pour quelque ennuy qu’il ait peu soustenir, Devers moy du depuis n’est voulu revenir. Ah ! qu’en ce tans heureux je sentoy de liesse, Me voyant favory de si belle princesse, Dont les yeux, gracieux qui doucement luisoient, Mille feux amoureux dans mon ame attisoient ! De ses divins propos je prenoy nourriture, J’admiroy les thresors du ciel et de nature ; Souvent par mes pensers aux cieux je m’enlevoy, Et, ravy de moy-mesme, en elle je vivoy. O tans heureux et doux ! ô saison desirable ! Helas ! que ta faveur me fut lors peu durable ! Que mon printans fut court, et comme en un moment J’esprouvay le malheur d’un obscur changement ! Tout l’estat de ce monde est un jeu d’inconstance. Mais encor en amour on voit moins d’asseurance ; Sa faveur est semblable à un beau jour d’hyver, Qui se perd aussi-tost qu’on le void arriver. Veu qu’en ce tans heureux, las ! je ne pouvoy croire Que le plus grand des dieux peust offenser ma gloire. Ce fut lors que mon heur en malheur se changea, Et que mon plus grand bien quand et vous s’estrangea. Vous fustes mariée ! ô dure souvenance ! Helas ! je meurs encor aussi-tost que j’y panse ! Je sens renouveller mes antiques douleurs, Et faut que de mes yeux je verse mille pleurs. Mais ce qui m’affligea d’un regret plus extrême Fut que je me trouvay sans vous et sans moy-mesme ; Car ce nouveau mary jaloux vous enleva, Et mon cœur pour jamais d’allegresse priva ; Laissant la cour sans grace, ennuyeuse et deserte, Et tous les beaux esprits qui gemissoient leur perte. Helas ! combien depuis ay-je esté travaillé ! Combien de fois la nuict, en sursaut éveillé, Ay-je arrosé de pleurs mon visage et ma couche, Ayant vostre beau nom à toute heure en la bouche, Et ne pouvant trouver de plus grand reconfort Que de crier sans cesse et d’implorer la mort ? Or durant les assauts de ma dure infortune, L’ennuy qui me pressoit autant que chose aucune. C’estoit que mon malheur n’estoit point entendu ; Car tyranniquement, vous m’aviez deffendu D’en faire aucune plainte, et de vous en escrire. Ainsi j’estoy contraint d’étouffer mon martire, Et mourir suffoqué sans m’oser deceler, Ni d’un seul mot d’escrit mes ennuis consoler ; Seulement vostre image en mon cœur si vivante Donnoit force à ma vie et la rendoit constante. Voilà les doux plaisirs qu’Amour m’a fait sentir, Sans que de ses prisons j’aye voulu sortir. Encor n’est-ce la fin de ma griéve souffrance ! J’ay sceu que vous doutez de ma perseverance, Et que ce que j’ay fait pour couvrir mon ardeur, Passoit en vostre endroit pour change ou pour froideur. Las ! est-ce le guerdon d’une foy si certaine ? Faut-il qu’apres l’angoisse et la mort inhumaine De brûler sans me plaindre, en vous obeïssant, Je sois plus que jamais à grand tort languissant ? Et qu’avec le destin vous faciez alliance Pour forcer tout d’un coup ma vie et ma constance ? Certes, vous avez tort, et ne sçauroy penser Qu’Amour, juste vengeur, ne s’en doive offenser. N’esperez toutesfois, ô chere Parthenie, Que j’en sois moins fidelle à vostre tyrannie ! Car ainsi comme l’or plus il est refondu, Rebattu, martelé, plus luisant est rendu, Tout ainsi ma constance au plus fort des allarmes, Des ennuis, des rigueurs, des soupirs et des larmes, Se monstrera plus belle et ne fléchira pas, Deussé-je en vous servant souffrir mille trespas. Car je croy qu’en mourant pour une beauté telle, On s’acquiert, comme en guerre, une gloire immortelle.