Élégie X

Je ne veux point blasmer la nature et les cieux, L’Amour, la providence, ou quelque autre des dieux ; Je ne veux, d’une voix qui s’accorde à ma perte, Faire haut resonner une plaine deserte, Blasphemant la fortune, et ne veux point tascher D’amollir par mes pleurs la rigueur d’un rocher, Bien qu’il me fust loisible en si triste avanture De dépiter le ciel, l’Amour et la nature ; Et que je peusse aussi, deplorant mon malheur, Esmouvoir les rochers et les bois à douleur. Il faut que de mon mal seule ayez connoissance, Puis que de m’en guarir seule avez la puissance. Car, helas ! si de vous ne vient ma guarison, La pourray-je esperer des choses sans raison ? C’est pourquoy seulement à vous je me retire, Pour, me plaignant de vous, consoler mon martire, Si vous le permettez : car de vous offenser J’endureroy la mort plustost que d’y penser. Ah ! que j’ay de regret, quand je mets en memoire Combien j’ay receu d’heur, de plaisir et de gloire, Depuis l’heure qu’Amour devers vous m’adressa, Et que son feu divin par vos yeux me blessa ; Car, presqu’au mesme instant, vous eustes connoissance Combien pour vous aimer j’enduroy de souffrance ; Dont vous fustes touchée, et, chassant mon soucy, Vous me fistes sçavoir que vous m’aimiez aussi. Alors trop fortune de vous je prenoy vie, Alors ma flamme estoit de la vostre suivie, Alors un mesme esprit nos deux corps animoit, Ainsi qu’un mesme trait nos deux cœurs entamoit. Helas ! qui me l’eust dit en ce tans desirable, Que vous aviez, madame, un vouloir si muable, Que mal je l’eusse creu ! veu qu’ores que j’en suis Trop clairement certain, croire je ne le puis, Ni ne le croiray plus, s’il se pouvoit tant faire Qu’il vous pleust d’un seul mot m’asseurer le contraire. Mais vous souvient-il plus qu’en nos communs propos Vous ne me laissiez point un moment de repos, Jalouse et deffiante, et tout vostre langage Estoit de m’appeller inconstant et volage ? Et toutesfois voyez que je n’ay point changé, Et que depuis trois ans que vos yeux m’ont rangé, De cent mille beautez l’aimable violance Ne m’a sçeu destourner de vostre obeyssance ; Car, quand je m’asseuroy qu’en feriez tout autant, Je voulois à l’envy vous demeurer constant Comme je fais encor, tenant à grand loüange Que vous tant seulement ayez suivy le change. Au moins si de mon lieu quelqu’un eust herité, Qui par extrême amour eust ce bien merité, Ou qui sçeust comme il faut d’une façon discrette Conduire et pratiquer une amitié secrette ; Qu’il peust dissimuler ses faveurs sagement, Feignant une tristesse en son contentement ; Qu’il pleurast ses douleurs, vous nommast inhumaine, Ou qu’il dist seulement qu’il a pris quelque paine Devant que d’estre aimé, j’en seroy moins fasché ; Mais, alors que je voy qu’il fait si bon marché D’une chose si rare, et n’en fait presque conte, Mon extrême douleur toute rage surmonte. Il se rit de ces vers dont j’estoy si jaloux, Il fait voir des faveurs qu’il jure avoir de vous Pour memoire et pour gage ; il a vostre peinture, Il dit qu’avez la sienne ; il sçait vostre nature, Il connoist vostre cœur et vostre intention, Et juge que pour luy vous souffrez passion ; Bref, par tous ses discours il voudroit faire accroire Qu’il s’est acquis sur vous quelque belle victoire. Hé Dieu sçait la fureur dont je suis possedé, Voyant que vostre choix a si mal succedé ! Ores que sans relasche à mon malheur je pense, Je n’ay contentement qu’à blasmer l’inconstance Et demeurer tout seul, bastissant à part moy Mille estranges desseins d’un homme hors de soy Et dis en soupirant : Chetif, que doy-je faire ? N’ay-je pas contre moy toute chose contraire ? A qui croiray-je plus ? tout le monde est sans loy, Puis que mesme ma dame a violé sa foy. Quelle estrange rigueur se veit jamais descrite Par tragiques regrets, qui ne soit plus petite, Si l’on pense à la gloire où j’estois élevé, Et par quelle injustice à coup j’en suis privé ? Malheureux qui dépend d’une dame muable ! S’il est contant un jour, l’autre il est miserable ; Sa nef vogue incertaine ores bas, ores haut ; Il a peur, il s’asseure, il est froid, il est chaud, Et n’a non plus d’arrest en son troublé courage Qu’il plaist aux mouvemens de la mer où il nage. Mon esprit sans relasche est ainsi tempesté, Car le vent qui l’esmeut n’est jamais arresté. Mais que ne faites-vous, ô beauté sans exemple ! Avec tant de thresors que l’ame en vous contemple Pour accomplir du tout vostre perfection, Que vous ayez un cœur qui soit sans fiction, Que vous gardiez tousjours un vouloir immuable, Qui plus que les beautez vous feroit admirable Et reluire icy bas : car sans la loyauté Il n’est point de vertu qui monstre sa beauté ; Commne sans la lumiere aux couleurs si duisante, Tout objet à nos yeux vainement se presante. Or, bien que vous m’ayez ingratement laissé, Et qu’un change impreveu fort avant m’ait blessé : Bien qu’en voyant celuy dont vostre ame est saisie J’ay plus pitié de vous que de luy jalousie, Bien qu’aux divers combats qui se font en mon cœur, Le desdain quelquefois de l’amour soit vainqueur ; Bien que le vray renom que j’ay d’estre fidelle, Avec grand avantage en d’autres lieux m’appelle, Voire et que mon esprit, qui se pense outragé, Consente au changement afin d’estre vangé ; Helas ! si ne sçauroy-je, il faut que je l’advouë, Suivre assez constamment le change que je louë ! S’il m’en prend fantasie, aussi soudainement, Confus et repentant, mon vouloir se dément ; Je ne vous puis hayr, quand je vous vois si belle, Je ne vous puis aimer, vous sçachant infidelle ; Mes sens sont en debat, mon esprit agité Chancelle constamment d’un et d’autre costé, Et suis si possedé de ma fureur extrême, Que je n’ay rien en moy qui s’accorde à moy-même. Que feray-je à la fin ? que veux-je devenir ? Je ne puis, malheureux, lâcher ny retenir ! Tout bien considéré, mon plus grand avantage, C’est que je m’abandonne au vent et à l’orage, Et, calant aux destins que je ne puis forçer, Je consente à regret tout bas en mon penser, Qu’infidelle et parjure, et pis cent fois encore, Il faut, bon gré mal gré, que mon cœur vous adore.