Élégie XVI

Lors que le trait d’Amour, sortant de vostre veuë, Passa comme un esclair mon ame à l’impourveuë, Et qu’en vos blonds cheveux mon cœur fut enlaçé, Bien que l’or en parust nonchalamment tressé, Nouvel Epimethé, trop tard je devins sage ; Apres le coup reçeu, j’en connu le dommage ; Je pleuray ma fortune et, tout bas maudissant L’inévitable loy du destin tout-puissant, Je vey bien que mon mal estoit sans esperance ; Car, bien qu’Amour n’observe aucune differance, Mesurant la noblesse à la fidelité, J’apprehenday pourtant nostre inégalité, Et, de peur que mon vol vous semblast temeraire, J’étouffay ma douleur et couvry mon ulcere, Esperant que le tans me pourroit alleger, Et mon nouveau desir en quelque autre changer. Mais plus en ces raisons folement je m’obstine, Plus le trait amoureux s’enfonce en ma poitrine ; Je ne puis plus souffrir un feu si devorant, Qui brûleroit plus fort moins j’iroy soupirant ; Il faut que je me lasche aux regrets et aux larmes, Vous monstrant par mes coups le pouvoir de vos armes Les mortels en leurs maux aux dieux ont leur recours, De vous semblablement j’attens tout mon secours. Et davantage encor, je serois à reprendre, Si par ce feu couvert j’estois reduit en cendre, Faute d’ouvrir mon cœur de flamme suffoqué. Car bien que le trespas j’aye assez invoqué, Comme unique remede à ma playe incurable, Si me déplairoit-il, vous estant dommageable. Moy qui ne suis plus moy, que perdroy-je en mourant Qui puisse estre dit mien par discours apparant ? Car mon esprit est vostre, et mon ame égarée Volle autour de vos yeux, de son corps separée. Je perdroy seulement ma flamme et mes douleurs, Je perdroy mes desirs, mes soucis et mes pleurs, Et de tant de pensers la grand’ troupe immortelle ; Vous perdriez quant à vous un serviteur fidelle, Que vos yeux seulement ont pouvoir d’animer, Et qui vous aime tant qu’il ne s’en peut aimer. Las ! si vous pretendez que j’aye fait offense D’oser tant entreprendre, écoutez ma deffense ! La faute vient de vous et d’Amour qui m’a fait Connoistre, en vous voyant, un sujet si parfait. Vous n’auriez pas raison de vous mettre en colere Pour une belle erreur, que vous m’avez fait faire ; Au lieu de m’accuser, accusez vos beaux yeux, Riches des traits d’Amour, cruels et gracieux ; Accusez vostre teint qui la neige surpasse, Accusez vos cheveux et vostre bonne grace, Et deffendez, madame, à vos jeunes beautez De n’emprisonner plus nos libres volontez. Si vous avez desir de n’estre point aimée, Ne voyez point le jour, demeurez enfermée, Tenez-vous dans un antre ou dans quelque rocher Encor vostre valeur ne se pourra cacher. Tousjours vous paroistrez en beautez la premiere Car partout le soleil découvre sa lumiere. Las ! dès le premier jour que vostre œil me ravit, Et que mon jeune cœur sous vos loix s’asservit. Je fis ce que je pu pour avoir delivrance. Et pour me rebeller de vostre obeïssance ; Je ne le faisoy pas de crainte d’endurer, Mais la peur seulement de n’oser aspirer A si digne service agitoit ma pensée, Qui ne vouloit pourtant estre ailleurs adressée ; Car mon cœur, que le ciel vous a predestiné, Aime mieux consentir au decret ordonné, Et mourir par vos mains d’une playe honorable, Qu’esprouver l’appareil d’autre amour favorable, Veu qu’au seul souvenir de ces hauts pensemens, Il se jouë en ses fers et se rit des tourmens. Soyez-moy donc, Madame, ou fiere ou gracieuse, Soyez ou ne soyez de mon mal soucieuse, Faites-moy reçevoir la vie ou le trespas, Bref, croyez ma constance ou ne la croyez pas, Vous ne ferez jamais, favorable ou contraire, Que d’un si haut dessein j’essaye à me distraire. D’autres nouveaux desirs je ne veux plus avoir, Et quand je le voudroy je n’auroy le pouvoir. Au feu des passions ma foy se rend plus forte, Puis contre vos dédains ce point me reconforte, Si par vostre rigueur je meurs avant le tans, Veu ma temerité, j’auray ce que j’attans. Car aux hautes amours ceste regle est commune Qu’en tempeste et en calme on court tousjours fortune.