Élégie XVII

Comme le pelerin, qui sent en son courage Un desir violant d’accomplir son voyage, Se reveille en sursaut et, comme il est poussé, Continuë à grands pas le chemin commençé, Mesme, afin que la nuict son desir ne retarde, Parmy l’obscurité leve l’œil et regarde, Choisissant pour sa guide un astre au firmament, Sous la faveur duquel il marche asseurément ; Pense bien remarquer la trace plus certaine, Maintenant passe un bois, maintenant une plaine, Un mont, une vallée, un coustau separé, Et va tant qu’à la fin il se trouve égaré ; Tout chemin luy est clos, ne sçait qu’il doive faire ; L’astre qu’il a choisi n’a la flamme assez claire Et les autres flambeaux, par le ciel reluisans, Pour le bien radresser ne sont pas suffisans. En fin la nuict s’envole, et l’aube colorée Haste le beau soleil à la tresse dorée, Qui de ses clairs rayons l’univers resjouit, Et toute autre lumiere aupres s’esvanouit. Lors il reprend courage et, joyeux, il saluë Ceste clarté nouvelle à son secours venuë, Se remet au chemin qu’il avoit delaissé, Et connoist de combien il s’est desadvancé. J’en ay fait tout ainsi, j’ay suivy mesme adresse, Vray pelerin d’Amour, dès ma tendre jeunesse ; Car mon âge si tost du printans n’approcha, Que ce dieu contre moy mille traits décocha, Se fit roy de mon ame, eschauffa mon courage, Et me mit au chemin de l’amoureux voyage. Lors, pour servir de guide à mon ardant desir, La jeunesse me fit une beauté choisir, Qui s’offrit favorable à mes yeux la premiere, Et que je reconneu pour ma seule lumiere. Son ardeur doucement mon esprit embrasoit, Je ne voyoy plus rien qu’ainsi qu’il luy plaisoit ; C’estoit mon seul objet, mon desir et ma flame, Et sa seule influence avoit force en mon ame. J’ay longuement erré parmy l’obscurité De mes sens aveuglez, suivant telle clarté ; J’ay passé maint taillis et maint desert champestre, Esloigné du chemin sans me pouvoir connoistre ; En vain mille beautez s’offroient devant mes yeux, Comme astres qui la nuict vont allumant les cieux ; Je n’en pouvoy tirer de plus seure conduite, Et tousjours leur clarté me sembloit trop petite. Mais, si tost que le jour de vos yeux m’esclaira, Mon cœur d’aise ravy ce soleil adora, Et connu tout soudain que la flame allumée Dedans moy paravant n’estoit rien que fumée ; De ma premiere erreur je fu tout asseuré, Et vey que jusqu’icy je m’estois égaré. Car celuy qui ne suit vostre beauté si rare, Seul soleil de nos ans, peut dire qu’il s’égare ; Son desir mal conduit erre sans jugement, Et ne connoist d’Amour l’agreable tourment. Il me souvient tousjours qu’en mon ardeur premiere, Lors que mon ame estoit autre part prisonniere, Je pensoy fermement qu’on ne sçeut mieux aimer, Et n’eusse jamais creu qu’Amour put enflamer Plus chaudement un cœur de sa vive estincelle, Ny qu’un parfait amant put estre plus fidelle. Mais vos yeux m’ont appris que j’estois abusé, M’ayant de tant de feux l’estomach embrasé, Et mis en mon esprit de pensers si grand nombre, Que ma premiere amour au prix n’estoit qu’un ombre Bref, je suis si pressé, qu’ores je connoy bien Helas ! qu’au prix de vous je n’aimay jamais rien. Vrayment c’est bien raison que l’amour qui me tuë, Passe toute autre amour qu’auparavant j’ay euë, Et qu’en vous adorant je croisse en loyauté, D’autant que vos beautez passent toute beauté, Beautez pleines de lis et de roses nouvelles, D’agreables langueurs, de flammes immortelles, D’amours, de doux attraits, de thresors precieux, Et des perfections que receloient les cieux. Car tout ce que le ciel avoit mis en reserve De plus belle richesse, en vos yeux se conserve, Vos yeux si beaux aux miens, qui me donnent le jour, Et qui font qu’Amour mesme est embrasé d’amour. Quant à moy, si je voy quelque autre damoiselle, Qui guide en cheminant les graces avec elle, Qui ait les cheveux beaux, les yeux cruels et doux, Je dy qu’en quelque chose elle approche de vous, Mais non pas que pourtant elle soit si parfaite ; Car pour chef-d’œuvre seul nature vous a faite, Tousjours on vous peut voir admirable exceller, Et à vous rien que vous ne se doit égaler ; Ainsi que la douleur qu’en mon ame j’assemble, Qui surpassant toute autre à soy seule ressemble. J’ay tousjours jusqu’icy blasmé l’extremité, Mais je pers cet advis perdant ma liberté, Car vous voyant, madame, en beautez tant extrême, Je consens que mon cœur extrêmement vous aime ; Je veux qu’en vous servant il souffre extrêmement Et le desavouroy, s’il faisoit autrement. Peut-estre quelque jour vous en serez touchée, Et, afin que ma mort ne vous soit reprochée, Finirez mes langueurs, aurez de moy pitié, Et recompenserez ma fidelle amitié. O dieux, si d’un tel heur je contente ma vie, Ne m’accordez plus rien de chose que je prie ! On ne me verra plus d’autres biens desireux, Et m’estimeray lors contant et bien heureux. Mais si, par mon malheur trop cruelle et trop fiere, Vous ne vous fléchissez au son de ma priere, Sans plaisir, sans confort, triste et desesperé, Je veux blasmer le ciel contre moy conjuré, Et maudire ma vie, où tout malheur abonde, Prenant congé d’Amour, le seul bien de ce monde. Car que me servira que je sois redouté, Que j’aye en mon printans maint effort surmonté, De m’estre veu le chef de si grandes armées, D’avoir des ennemis les campagnes semées, D’estre échappé vainqueur de cent mille dangers, D’estre le seul effroy des princes estrangers, D’un roy si genereux avoir pris ma naissance, Courageux, indonté, d’invincible puissance ; Avoir dessus mon front semé tant de lauriers, Avoir jeune arraché la palme aux vieux guerriers, Jusqu’au plus haut du ciel planté ma renommée, Que le tans ny la mort ne rendront consommée, Bien voulu d’un chacun, bien craint, bien estimé, Si de vous seulement je ne puis estre aimé, Et si vous refusez de m’estre favorable ? La grandeur sans amour est chose miserable. J’aimeroy beaucoup mieux estre né bassement, N’avoir point tant de cœur, ny tant de sentiment, Que mon esprit fust lourd et mon ame pesante, Ma douleur pour le moins ne seroit si cuisante ; Car plus un homme est grand et de gloire animé, Plus chaud est le brandon qui le rend consumé ; Et le mal qui le presse est beaucoup plus terrible Que celuy du commun, qui est presque insensible. Puis je croy fermement qu’Amour victorieux A des flèches à part pour les rois et les dieux, Et ne sçauroy penser que les grands il surmonte, Comme le peuple bas, dont presque il ne fait conte. Las ! de ses traits choisis mon cœur est traversé, Il a tout dedans moy son carquois renversé ; Je suis sa trousse mesme et sa chaude fournaise ; Vos yeux et mes pensers en nourrissent la braise, Dont mon cœur languissant sera tost devoré, Si par l’eau de pitié ce feu n’est moderé. Car, le voulant couvrir d’une froide apparence, Par ma discretion j’accrois sa violence ; De vous voir bien souvent ne faisant pas semblant, Quand je suis tout en feu feignant d’estre tremblant, Et me monstrant joyeux en ma douleur cruelle, Seul entre tous les grands qui mes amours recelle. Car eux communément au lieu de les celer, Trouvent mille sujets pour en faire parler, Où moy je les contrains et les cache en mon ame, Aimant mieux endurer que de nuire à ma dame, Et ne voulant qu’un peuple ignorant et sans loy Connoisse mes desirs et babille de moy. Ceux qui sçavent comment à part je me retire, Que je me plais tout seul, que j’aime tant à lire Les passions d’Amour, ses effets rigoureux, Jugent tout aussi tost que je suis amoureux. Ils le disent assez, mais ils n’ont connoissance Que vous me reteniez en vostre obeïssance, Tant je sçay bien couvrir mon desir violant, Qui, las ! croist d’autant plus que je le vay celant ! Mais j’aime mieux souffrir une douleur plus forte, Que mon allegement quelque ennuy vous apporte ; J’aime mieux me priver du beau jour de vos yeux, Fuyant ce que j’adore et que j’aime le mieux, Car j’ay ce reconfort, qui mon mal diminuë, De penser que ma foy par-là vous soit connuë, Et que la verité de mon affection Se découvre aisément par ma discretion, Qui est de fermeté le plus seur tesmoignage ; Jamais homme discret ne sçeut estre volage.