Élégie XVIII

Celuy n’avoit d’Amour essayé la puissance, Qui le fit un enfant privé de connoissance, Ouvert, sans fiction, sans yeux, sans jugement, Aussi nu de conseil comme d’accoustrement ; Car, pour rendre une amour éternelle et secrette, Trompant les aiguillons de la tourbe indiscrette, Il faut avoir des yeux, estre sage et rusé, Et se masquer le cœur d’un propos déguisé, Qui paroisse sans art, entier et veritable, Autrement une amour ne peut estre durable. Ceux le sçavent assez qui, craignans les dangers Qu’apporte un haut desir, par leurs yeux messagers Font entendre à leur dame, à secrettes volées, L’ardeur et la grandeur des flammes recelées ; Et par tout autre part déguisans leur tourment, Monstrent de n’aimer point, discourent librement ; Et souffrans sans mot dire en longue patience, Attendent que le tans leurs douleurs recompense, Et qu’ils puissent un jour, pleins de felicité, Remonstrer sagement ce qu’ils ont merité. Mais il est mal aisé que leurs tristes pensées, Ou de leurs yeux legers les œillades lançées, Ou quelque chaud soupir par mégarde lasché, Ne découvre à la fin ce qu’ils avoient caché. Qui veut donc receler une amoureuse flame, Il faut qu’en adorant sa deesse en son ame, Il feigne aimer ailleurs, et le feigne si bien, Que le peuple s’abuse et n’y connoisse rien ; Non le peuple sans plus, mais la dame empruntée Doit estre tellement par sa feinte enchantée, Par ses brûlans soupirs, par ses mots déguisez, Et par ses yeux trompeurs de larmes arrosez, Qu’elle afferme en son cœur qu’il ne se sçauroit faire, Qu’une Venus nouvelle à soy le peut attraire. Celuy qui sagement ainsi se peut former, Déguisant sa pensée, est seul digne d’aimer. Las ! je merite donc d’aimer toute ma vie ! Car je sçay deçevoir la malice et l’envie Par fausses passions, je sçay bien soupirer, Je sçay de mes deux yeux deux fontaines tirer, Pour fléchir la rigueur d’une feinte maistresse ; Je sçay faire le triste, accusant sa rudesse, Tenir les yeux en bas de mes pleurs tous lavez, Et monstrer que ses mots dans mon cœur sont gravez ; Bref, je puis à bon droit me donner cette gloire Que, quand j’ay feint d’aimer, je l’ay peu faire accroire. Mais ce qu’il faut douter, ce chemin poursuivant Avec tant de labeurs, c’est que le plus souvant La deesse en nos cœurs saintement adorée, Pour loyer de la peine en feignant endurée, Juge tout autrement de nostre volonté, Et prend la fiction pour une verité, Si bien que cette amour sagement commençée Par une impatience est souvent delaissée. Madame, en qui le ciel liberal a posé Tout ce qu’il reservoit de rare et de prisé, Estant serf de vos yeux, je ne dois avoir crainte Que vous pensiez jamais mon amour estre fainte, Car si le plus souvent je feins ne vous voir pas, Si, craignant vous trouver, je tourne ailleurs mes pas, Si je n’ose en mourant vous conter mon martire, Si près d’une autre dame esperdu je soupire, Si je dy que je meurs blessé de sa beauté, Si le peuple me juge ardamment agité, Et croist que ceste amour toute autre amour efface, Helas ! vous sçavez bien qu’il faut que je le face, Encor que ce me soit un extrême tourment, Et qu’il ne m’est permis vous aimer autrement. Si j’osoy me douloir des maux que vous me faites, Pouvoir parler à vous, voir vos beautez parfaites, Encor que vos propos me fussent rigoureux, Quel amant plus que moy se diroit bien heureux ? Contant, je me plairoy au fort de ma souffrance ; Car le bien de vous voir me seroit recompance. Mais ce m’est un tourmant impossible à penser Qu’il faille en mes travaux ma volonté forcer, Et brûlant, sans crier, d’une flamme secrette, Me priver, malheureux, du bien que je souhaitte ; M’esloigner de vos yeux, n’oser m’en approcher, Et pour couvrir mon mal un autre rechercher. Toutesfois je le fais, afin qu’en cette sorte Vous connoissiez au vray l’amour que je vous porte Et, qu’estant de vos yeux vivement embrasé, Le plus fascheux sentier ne m’est point mal-aisé. Or de vous deffier que, sous ceste entreprise, Je poursuive une amour dont mon ame est esprise Et, qu’estant autre part, j’y reçoive plaisir, Plustost qu’y demeurer pour cacher mon desir, Vous n’auriez pas raison. Car cil qui vous a veuë D’attraits et de beautez si richement pourveuë Peut aller tout par tout sans crainte et sans danger Et, quoy qu’il voye après, il ne peut plus changer. De toute autre prison la vostre le delivre, Et le seul souvenir de vos yeux le fait vivre. J’en parle asseurément pour l’avoir esprouvé ; Car depuis que l’Amour dans mon cœur eut gravé Vostre divin pourtrait, qui causa sa victoire, De tout autre penser je perdy la memoire ; Je ne pense qu’en vous qui m’avez arresté, Et mon œil est aveugle à toute autre beauté. Vivez doncques, madame, à bon droit asseurée Que ma foy vous sera d’éternelle durée. Je veux, sans varier, mourir en vous aimant. Cependant s’il vous plaist, pour mon contentement, Jugez si je supporte une douleur extrême, Feignant d’aimer ailleurs durant que je vous aime.