Rymes Tierces

Si jamais plus ma liberté j’engage Au faux Amour, jadis roy de mon cœur, Que je languisse en eternel servage. Si jamais plus son feu brûle mon ame, Que je n’esprouve en aimant que rigueur, Et que mes pleurs fassent croistre ma flame. Si jamais plus une beauté mortelle Tient mon esprit en la terre arresté, Que mon mal serve à la rendre plus belle. Si jamais plus pour ses yeux je soupire, Que mes soupirs croissent sa cruauté Et de mes cris ne se fasse que rire. Qu’elle soit folle, inconstante et volage, Que j’en enrage, et qu’en me despitant De la laisser je perde le courage. Que de l’aimer je rougisse de honte, Et toutesfois que je luy sois constant, En luy voyant d’un valet faire conte. Que toute nuict à son huis je lamente, Et qu’elle soit à se mocquer de moy ; Aux bras d’un autre heureusement contente. Qu’un chaud martel, qu’une aspre jalousie De cent fureurs recompensent ma foy, Et que tousjours mon ame en soit saisie. Que mon teint pasle et mon visage blesme, De tant d’ennuis maigre et defiguré, Me soit horrible et m’étonne moy-mesme. Que le soleil à regret me regarde, Bref, que le ciel, contre moy conjuré, Pour mon salut ma mort mesme retarde. Mais, si d’Amour la sagette meurtriere Ne me peust plus désormais entamer, O justes dieux ! accordez ma priere ! Qu’en peu de jours cet œil, mon adversaire, Flambeau d’amour qui m’a fait consumer, Perde sa flame et sa lumiere claire ; Que ses cheveux, dont mon ame fut prise, Laissent son chef, apres avoir changé Leur couleur d’or en une couleur grise. Que de ses mains son miroir elle rompe, Voyant sa face, et que je sois vangé De ce crystal qui maintenant la trompe. Qu’elle ait regret à sa jeunesse folle, Et qu’elle apprenne, helas ! trop cherement, Que la beauté comme le vent s’envolle. Lors sans danger, sans douleur et sans crainte, Je me riray d’avoir si longuement A la servir ma liberté contrainte. Puis je prendray sa vaine repentance Et ses soupirs pour heureux payement De mes douleurs et de son arrogance.