Songe. — Celle que j’aime tant, lasse d’estre cruelle

Celle que j’aime tant, lasse d’estre cruelle, Est venuë en songeant la nuict me consoler : Ses yeux estoient rians, doux estoit son parler, Et mille et mille amours voloient à l’entour d’elle. Pressé de ma douleur, j’ay pris la hardiesse De me plaindre à hauts cris de son cœur endurcy, Et d’un œil larmoyant luy demander mercy, Et que mort ou pitié mist fin à ma tristesse. Ouvrant ce beau coral qui les baisers attire, Me dist ce doux propos : Cesse de soupirer, Et de tes yeux meurtris tant de larmes tirer, Celle qui t’a blessé peut guarir ton martire. O douce illusion ! ô plaisante merveille ! Mais combien peu durable est l’heur d’un amoureux. Voulant baiser ses yeux, helas ! moy, malheureux ! Peu à peu doucement je sens que je m’éveille. Encor long-tans depuis, d’une ruse agreable, Je tins les yeux fermez et feignois sommeiller : Mais, le songe passé, je trouve au réveiller Que ma joye étoit fausse et mon mal veritable.