Sonnet LI. — Heureux anneau de ma belle inhumaine

Heureux anneau de ma belle inhumaine, Que je t’estime et combien tu me plais ! C’est toy, mignon, qui mes ennuis desfais, Par les vertus dont ta pierre est si plaine. A ton objet mon œil se rasseraine, La peur me fuit, d’espoir je me repais ; Toute ma guerre est convertie en paix, Et ne cognois ny tristesse ny paine. Tu es tout rond : parfaite est la rondeur ; Tu es tout d’or, pour monstrer la grandeur De mon amour épuré par la flame. Du Lydien l’anneau tant renommé, Qui le fit prince et joüir de sa dame, S’il estoit mien, ne seroit mieux aimé.