Sonnet LII. — Quand la fiere beauté qu’uniquement j’admire

Quand la fiere beauté qu’uniquement j’admire Faisoit luire à Paris les soleils de ses yeux, On ne voyoit par tout qu’un printans gracieux, Et tousjours mollement soupiroit un zéphyre. Mais, depuis que son œil autre part alla luire, La France n’a rien veu qu’un hyver soucieux, Tout noircy de broüillards, obscur et pluvieux, Et les fiers aquilons furieusement bruire. Or’ les monts où elle est, qui souloient par avant Et, l’esté plus ardant, estre battus du vant, De frimas, de gelée et de glace eternelle, Sont, au mois de janvier doucement évantez ; Les eaux parlent d’amour, et, de tous les costez, On ne voit rien que fleurs et verdure nouvelle.