Sonnet LV. — Amour brûle mon cœur d’une si belle flame

Amour brûle mon cœur d’une si belle flame, Et suis sous son pouvoir si doucement traité, Que, languissant ainsi captif et tourmenté, Je beny la prison et le feu de mon ame. Vous autres, prisonniers, que son ardeur enflame, Souhaitez moins de peine et plus de liberté. Pour moy, je veux mourir en ma captivité, Consommé par le feu des beaux yeux de ma dame. Les travaux, les rigueurs, la peine et le malheur Embellissent ma gloire, et n’ay plus grand’ douleur Que quand cet œil felon autre que moy tourmente. Je n’ay pas toutesfois perdu le jugement, Car on dit bien heureux celuy qui se contente, Et je trouve à l’aimer mon seul contentement.