Sonnet LXII. — Quoy que vous en pensiez, je suis tousjours semblable

Quoy que vous en pensiez, je suis tousjours semblable ; Le tans, qui change tout, n’a point changé ma foy. Les destins, mon vouloir, et ce que je vous doy, Font qu’aux flots des malheurs mon ame est immuable. Vos yeux, dont la beauté rend ma perte honorable, N’ont jamais veu de serf si fidelle que moy ; Je tien des simples corps dont constante est la loi : Tousjours je vous adore, et rude, et favorable. L’absence et les rigueurs de cent mille accidens N’ont sçeu rendre en quatre ans mes brasiers moins ardans, Ny les diminuer d’une seule estincelle. Vous serez le premier et dernier de mes vœux, J’en jure par vos yeux, et par vos blonds cheveux, Et par l’eternité de ma peine cruelle.