Sonnet LXIX. — Si j’aime autre que vous, que l’honneste pensée

Si j’aime autre que vous, que l’honneste pensée Qu’Amour loge en mon cœur s’en puisse departir, Et que vostre beauté, qui m’a rendu martyr, Ne me soit jamais plus que fiere et courroucée ! Si ce n’est de vostre œil que mon ame est blessée, Jamais d’allegement je n’y puisse sentir, Qu’à regret je vous serve, et, taschant de sortir, Que de plus pesans fers ma raison soit pressée ! Si j’ayme autre que vous, Amour, tyran des dieux, Les feux croisse en mon ame et les pleurs en mes yeux, Et que vostre rigueur mon service rejette ! Las ! je n’aime que vous, ny ne sçaurois aimer ; Je despite autre amour qui me sçeut enflamer : Mon cœur est une roche à toute autre sagette.