Sonnet LXXIV. — Si l’amour de ma foy rend vostre ame craintive

Si l’amour de ma foy rend vostre ame craintive, Doutant que ce vouloir, qui jadis m’a brûlé, Par le temps à la fin soit éteint ou gelé, Que de si vaine erreur la verité vous prive. Jamais en mon esprit flamme ne fut si vive, Je suis tel que j’estois quand mon cœur fut volé, Le jour qu’un chaste amour, dans vos yeux recelé, Rendit heureusement ma liberté captive. Je gouste, en vous oyant, mesme ravissement, Je tremble, en vous voyant, d’aise et d’estonnement, De vostre seul regard ma blessure s’allege. Jamais autre que vous constant ne me rendra ; Je suis serf de Diane, et qui me retiendra Doit estre chastiée ainsi que sacrilege.