Sonnet LXXVI. — J’ay couru, j’ay tourné, volage et variable

J’ay couru, j’ay tourné, volage et variable, Selon que la jeunesse et l’erreur m’ont poussé, Et mon vol trop hardi jusqu’au ciel j’ay haussé, Dressant à mes desirs maint trophée honorable. S’il y eut onc amant heureux et miserable, Fasché, contant, jaloux, bien et mal carressé, Qui par tous les destours hazardeux ait passé, C’est moy dont le renom doit estre memorable. Rendu sage à la fin, je me suis retiré À vostre œil, qui de moy fut premier adoré, Ne trouvant autre part nulle flamme assez claire. Vous seule à l’avenir ayez sur moy pouvoir, Les amours de ce tans vostre foy m’ont fait voir : Un contraire est tousjours mieux veu par son contraire.