Sonnet VI. — O grand démon volant, arreste la meurtriere

O grand démon volant, arreste la meurtriere Qui fuit devant mes pas, car pour moy je ne puis ; Ma course est trop tardive, et plus je la poursuis, Et plus elle s’avançe, en me laissant derriere. Ou fay que son vouloir s’accorde à ma priere, Ou ne me laisse plus en l’estat que je suis ; Rends moy comme j’estois, sans dame et sans ennuis, Et delivre ma vie, en ses yeux prisonniere. Si tu es juste, Amour, tu me dois délier, Ou par un doux effort ceste dure plier ; Mais, las ! que mon attente est folle et miserable ! J’importune un tyran, qui de nos maux se plaist, Qui s’abreuve de pleurs, qui d’ennuis se repaist, Et plus il est prié, moins il est pitoyable.