Sonnet VII. — Ma dame, Amour, Fortune et tous les elemens

Ma dame, Amour, Fortune et tous les elemens, Animez contre moy, sont bandez pour me nuire : Sans plus le doux sommeil de leurs fers me retire, Et fait peur à mes maux par ses enchantemens. O songe ! ange divin, sorcier de mes tourmens, Je voy par ta faveur ce que plus je desire : Tu me fais voir ces yeux qui font que je soupire, Et fais naistre en mon cœur mille contentemens. Mais la rage d’Amour, qui point ne diminuë, Avec tous tes efforts empesche ta venuë, Et ne sens pas souvent ton doux allegement. Donc, puis qu’il est ainsi lors que tu me visites, Helas ! songe amoureux, dure plus longuement, Afin que tes faveurs ne soient pas si petites.