Sonnet X. — Je suis chargé d’un mal qui sans fin me travaille

Je suis chargé d’un mal qui sans fin me travaille ; Quelque part que je tourne, il me suit obstiné : Tout conseil, tout secours sans profict m’est donné, Car tousjours plus au vif sa rigueur me tenaille. Le lict en mes pensers est un champ de bataille ; Si je saute du lict, j’en suis plus mal mené ; Si je sors, le tyran, qui me tient enchaisné, A toutes les fureurs pour conduite me baille. Ici l’ardant desir m’anime à bien aimer, Plus pres le desespoir me veut faire abismer ; Je suis en mesme tans tout de flamme et de glace. Sans fin mesmes discours je refaits et desfaits. O miserable esprit ! quel amour, quelle paix D’un chaos si confus débroüillera la masse ?