Sonnet XIV. — Malheureux que je suis ! je vous soulois descrire

Malheureux que je suis ! je vous soulois descrire Mon naturel leger jamais ne s’arrestant, Prenant à grand honneur que je fusse inconstant, Et, tel comme j’estois, me plaisant à le dire. Maintenant que vostre œil sans pitié me martire, Ma nouvelle douleur d’heure en heure augmentant, Je maudy mon offense, honteux et repentant, Et trop tard pour mon bien je cherche à m’en dedire. Quel confort ? quel remede ? Amour, conseille-moy : Pourra-t-elle jamais s’assurer de ma foy, M’ayant connu devant si leger de courage ? Helas ! mon inconstance à sa gloire a esté, Car quel plus grand honneur que d’avoir arresté Celuy qui s’asseuroit d’estre tousjours volage ?