Sonnet XLI. — S’il est vray que le ciel ait sa course eternelle

S’il est vray que le ciel ait sa course eternelle, Que l’air soit inconstant la mer sans fermeté, Que la terre en hyver ne ressemble à l’esté, Et que pour varier la nature soit belle ; S’il est vray que l’esprit, d’origine immortelle, Cherchant tousjours d’apprendre, aime la nouveauté, Et si mesme le corps, pour durer en santé, Change, avec les saisons, de demeure nouvelle, D’où vient qu’estant forcé, par la rigueur des cieux, A changer, non de cœur, mais de terre et de lieux, Je ne guarisse point de ma vive pointure ? D’où vient que tout me fasche et me desplaise tant ? Helas ! c’est que je suis seul au monde constant, Et que le changement est contre ma nature.