Sonnet XLVII. — Malheureux fut le jour, le mois et la saison

Malheureux fut le jour, le mois et la saison Que le cruel Amour ensorcela mon ame, Versant dedans mes yeux, par les yeux d’une dame, Une trop dangereuse et mortelle poison. Helas ! je suis tousjours en obscure prison ; Helas ! je sens tousjours une brûlante flame ; Helas ! un trait mortel sans relâche m’entame, Serrant, brûlant, navrant, esprit, ame et raison. Que sera-ce de moy ? Le mal qui me tourmente, En me desesperant, d’heure en heure j’augmente, Et plus je vay avant, plus je suis mal-heureux. Que maudicte soit donc ma dure destinée, L’heure, le jour, le mois, la saison et l’année Que le cruel Amour me rendit amoureux !