Sonnet XXIV. — Je ne suis point jaloux ny ne le veux point estre

Je ne suis point jaloux ny ne le veux point estre, Quand un plus fortune sera de vous reçeu ; M’appercevant trop tard que je me suis deçeu, Je cesseray de suivre un enfant pour mon maistre. Bien que vostre beauté mon desir ait fait naistre, Il fust mort toutesfois aussi-tost que conçeu, Sans l’espoir tout riant qu’en vos yeux j’apperçeu, Qui ma flamme a nourrie et l’a fait ainsi croistre. J’ay sur vostre constance assis mon bastiment : C’est une eternité, s’il a bon fondement ; Sinon, au premier vent, adieu l’architecture. Si ce malheur m’advient, saintement je promets Qu’aux sermens et aux pleurs je ne croiray jamais, Ny qu’au cœur d’une femme une seule amour dure.