Sonnet XXVIII. — Je ne me plains de vostre cruauté

Je ne me plains de vostre cruauté A mes desirs injustement contraire ; Je ne me plains que tout me desespère, Ny que le tans cede à ma loyauté. Je ne me plains du vol que j’ay tenté, Jeune Dedale, aux perils temeraire ; Quoy qu’il en soit, j’auray de quoi me plaire, Fondant aux rais d’une telle beauté. Je ne me plains que l’effort des jaloux De moy me prive en me privant de vous ; Je ne me plains que tout me fasse craindre ; Mais, en souffrant tant de punitions, De desespoirs, de morts, d’afflictions, Las ! je me plains que je ne m’ose plaindre !