Sonnet XXXVI. — Pour me recompenser de tant de passion

Pour me recompenser de tant de passion Que supporte mon cœur, devot à ton service, Te l’offrant pour victime, en flambant sacrifice, Et me rendant pour toy compagnon d’Ixion : Non, ne paye ma foy d’aucune affection ; Puis que c’est ton vouloir, il faut que j’obeïsse. Paye moy de rigueur, paye moy d’injustice, Je n’en puis estre moins à ta devotion. Preste moy seulement ceste œillade divine Qui me combla d’amour le cœur et la poitrine, Et qui d’un feu cuisant m’embrasa les espris, Afin qu’en me joüant soudain je te regarde, Et que cent mille amours dans le sein je te darde, Alors tu seras prise au jeu que tu m’as pris.