Poème 'S’il veut contre-peser ses heurs, et ses mal-heurs…' de Jean-Baptiste CHASSIGNET dans 'Mespris de la vie et consolation contre la mort'

S’il veut contre-peser ses heurs, & ses mal-heurs
Celuy qui bien-heureus sur tout autre se nomme
Il se reputera le plus mal-heureus homme
Qui respire de l’air les vitales chaleurs :

Voire tu ne voudrois à souffrir les douleurs,
Et travaus de l’esprit, dont sans cesse il consomme
Son ceur passionne, vivre trois jours en somme
Heureus de mesme sorte, entre tant de langueurs :

Tiens que les biens mondains s’acquierent en contrainte
Ennui, peine, & travail, & possedent en crainte
Se perdent en regret, pleur, & calamité.

Tu verras, Casanat, non comme tu le pense
Que mesme de nostre heur l’instable jouissance
Est pleine de mal-heur, & d’infelicité.