Poème 'Mon cueur m’a fait commandement' de Charles d'ORLEANS dans 'Ballades'

Mon cueur m’a fait commandement
De venir vers vostre jeunesse,
Belle que j’ayme loyaument*,
Comme doy faire ma princesse.
Se vous demandés :  » Pour quoy esse ?
C’est pour savoir quant vous plaira
Alegier sa dure destresse
Ma dame, le sauray je ja** ?

Ditez le par vostre serment !
Je vous fais leale*** promesse
Nul ne le saura, seulement
Fors que lui pour avoir leesse.
Or lui moustrés qu’estes maistresse
Et lui mandez qu’il guerira,
Ou s’il doit morir de destresse !
Madame, le sauray je ja ?

Penser ne porroit nullement
Que la douleur, qui tant le blesse,
Ne vous desplaise aucunement.
Or faitez dont tant qu’elle cesse
Et le remettés en l’adresse
D’espoir, dont il party pieça**** !
Respondez sans que plus vous presse !
Madame le sauray je ja ?

(*) loyalement
(**) bientôt
(***) loyale
(****) il y a longtemps